بنوں میں پولیس تھانوں پر 10 حملے ناکام، شدت پسندوں کے 130 سے زائد ڈرون حملے روکے گئے

بنوں (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع بنوں میں دہشتگردی کے خلاف جاری پولیس آپریشنز میں شدت پسندوں کی متعدد کارروائیاں ناکام بنائی گئی ہیں۔

پولیس کے بیان کے مطابق ریجن میں شدت پسندوں نے پولیس تھانوں اور چوکیوں پر 10 حملوں کی کوششیں کیں اور 130 سے زائد ڈرون حملے ناکام بنائے گئے۔ گزشتہ ایک ہفتے کے دوران دہشتگردوں کے خلاف آپریشنز میں 14 انتہائی مطلوب شدت پسند ہلاک اور 22 زخمی ہوئے۔

رپورٹ میں بتایا گیا ہے کہ 28 اگست 2025 سے اب تک بنوں ریجن میں ہونے والے تمام دہشتگردانہ حملے ناکام بنائے جا چکے ہیں۔

آر پی او بنوں سجاد خان نے کہا کہ بنوں کے بعض علاقوں میں دہشتگردوں کے ٹھکانے موجود ہیں اور شدت پسند متعدد حملے کر چکے ہیں۔ انہوں نے کہا کہ آئی جی کے پی نے بنوں ریجن کو دہشتگردی سے نمٹنے کے لیے بھرپور وسائل فراہم کیے، جس میں تھانوں پر بلٹ پروف گیٹس اور ڈبل وال سسٹم شامل ہیں۔

سجاد خان نے مزید کہا کہ بنوں ریجن کو جدید اسلحہ اور حفاظتی وسائل سے لیس کیا گیا ہے، جس کے باعث دہشتگردوں کے بڑے حملے ناکام بنائے گئے۔ آپریشنز کے دوران عوام نے بھرپور تعاون فراہم کیا اور دہشتگردوں کے ڈرون حملے بھی جدید ٹیکنالوجی کے ذریعے ناکام بنائے گئے۔