بونیر میں دہشت گردوں کی فائرنگ سے سی ٹی ڈی افسر ہلاک

پشاور (ڈیلی اردو رپورٹ) پاکستان کے شورش زدہ صوبہ خیبرپختونخوا کے ضلع بونیر میں نامعلوم دہشت گردوں کی فائرنگ سے ایک پولیس افسر ہلاک ہو گیا، جبکہ حملہ آور موقع سے فرار ہونے میں کامیاب ہو گیا۔ واقعے کے بعد علاقے میں سرچ آپریشن شروع کر دیا گیا ہے۔

ابتدائی اطلاعات کے مطابق واقعہ ضلع بونیر کے علاقے طوطالی خدوخیل میں پیش آیا، جہاں کاؤنٹر ٹیررازم ڈیپارٹمنٹ (سی ٹی ڈی) کا سب انسپکٹر مسکین زادہ ایک دکان میں موجود تھے۔ اسی دوران مسلح دہشت گرد دکان میں داخل ہوا اور ان پر اندھا دھند فائرنگ کر دی۔

فائرنگ کے نتیجے میں پولیس اہلکار موقع پر ہی ہلاک ہو گئے، جبکہ حملہ آور فرار ہونے میں کامیاب ہو گیا۔

ذرائع کے مطابق حملہ آور مبینہ طور پر گزشتہ کئی روز سے پولیس کی نگرانی میں تھا اور اس کی گرفتاری کے لیے محکمہ انسداد دہشت گردی (سی ٹی ڈی) کی جانب سے مختلف علاقوں میں چھاپے بھی مارے گئے تھے، تاہم وہ قانون نافذ کرنے والے اداروں کی گرفت سے بچ نکلا۔

واقعے کے بعد پولیس اور دیگر قانون نافذ کرنے والے اداروں نے جائے وقوعہ کو گھیرے میں لے کر شواہد اکٹھے کیے، جبکہ حملہ آور کی گرفتاری کے لیے علاقے میں سرچ آپریشن شروع کر دیا گیا ہے۔

پولیس حکام کا کہنا ہے کہ واقعے کی مختلف پہلوؤں سے تحقیقات جاری ہیں اور حملے میں ملوث ملزم کو جلد گرفتار کرنے کی کوشش کی جا رہی ہے۔

تاحال کسی گروپ نے اس حملے کی ذمہ داری قبول نہیں کی ہے۔