بھارتی افواج کی ہم آہنگی کے باعث پاکستان نے ہتھیار ڈالے، وزیرِ اعظم مودی

نئی دہلی (ڈیلی اردو) بھارتی وزیرِ اعظم نریندر مودی نے پیر کے روز کہا کہ بھارت کی تینوں مسلح افواج کے درمیان غیر معمولی ہم آہنگی نے "آپریشن سیندور" کے دوران پاکستان کو ہتھیار ڈالنے پر مجبور کر دیا۔

مودی نے یہ بات بھارتی بحریہ کے طیارہ بردار جہاز آئی این ایس وکرانت پر دیوالی کے موقع پر خطاب کرتے ہوئے کہی، جہاں وہ جہاز کے عملے کے ساتھ تہوار منا رہے تھے۔

آئی این ایس وکرانت بھارت کا چوتھا طیارہ بردار جہاز ہے اور مکمل طور پر ملک میں تیار ہونے والا پہلا بحری جہاز ہے۔

وزیرِ اعظم مودی نے کہا، “بھارتی بحریہ کے پیدا کردہ خوف، فضائیہ کی غیر معمولی مہارت، بری فوج کی شجاعت اور تینوں افواج کی شاندار ہم آہنگی نے پاکستان کو آپریشن سیندور کے دوران بہت جلد ہتھیار ڈالنے پر مجبور کر دیا۔”

مودی کے بقول، “چند ماہ پہلے ہی ہم نے دیکھا کہ ’وکرانت‘ کے صرف نام سے پاکستان میں خوف کی لہر دوڑ گئی۔ یہ ایک ایسا نام ہے جو جنگ شروع ہونے سے پہلے ہی دشمن کے حوصلے پست کر دیتا ہے۔ یہی ہے آئی این ایس وکرانت کی اصل قوت۔”

انہوں نے مزید کہا کہ “یہ جہاز لوہے سے بنے ہیں، مگر جب ان پر ہمارے فوجی سوار ہوتے ہیں تو یہ زندہ، سانس لیتی طاقت بن جاتے ہیں۔”

دفاعی برآمدات

مودی نے کہا کہ بھارت کے میزائلوں نے آپریشن سیندور کے دوران اپنی صلاحیت ثابت کی۔ “آکاش اور برہموس جیسے میزائلوں کا صرف نام ہی دشمن میں خوف پیدا کر دیتا ہے۔ بہت سے ممالک ان میں دلچسپی رکھتے ہیں۔ بھارت اب تینوں افواج کے لیے دفاعی سازوسامان برآمد کرنے کی صلاحیت حاصل کر رہا ہے۔”

انہوں نے بتایا کہ گزشتہ دہائی میں بھارت کی دفاعی برآمدات میں تیس گنا اضافہ ہوا ہے، جس میں دفاعی اسٹارٹ اپس کا بڑا کردار ہے۔

مودی نے کہا کہ عالمی تجارت کا بڑا حصہ بھارتی سمندر سے گزرتا ہے، اور بھارتی بحریہ عالمی استحکام برقرار رکھنے میں اہم کردار ادا کرتی ہے۔ ان کے مطابق دنیا کی 66 فیصد تیل کی ترسیل اور 50 فیصد کارگو شپمنٹس بھارتی سمندر سے گزرتی ہیں۔

فوج کے ساتھ دیوالی منانے کی روایت

یاد رہے کہ 2014 میں اقتدار سنبھالنے کے بعد سے مودی ہر سال دیوالی کا تہوار فوجی جوانوں کے ساتھ مناتے ہیں۔

2014 میں انہوں نے سیاچن میں، 2015 میں امرتسر میں ڈوگرائی وار میموریل پر، اور گزشتہ سال گجرات کے کَچھ میں بی ایس ایف، فوج، بحریہ اور فضائیہ کے اہلکاروں کے ساتھ دیوالی منائی تھی۔