بھارتی خفیہ ایجنسی را کیلئے کام کرنیوالا اسپیشل برانچ پولیس کا افسر گرفتار

‏کراچی (ڈیلی اردو) فیڈرل انوسٹیگیشن ایجنسی نے بھارتی خفیہ ایجنسی ’را‘ کے لئے کام کرنے والے اسپیشل برانچ پولیس کے اسسٹنٹ سب انسپکٹر کو گرفتار کرلیا۔

بھارتی خفیہ ایجنسی ’را‘ نیٹ ورک کے خلاف تابڑ توڑ کارروائیاں جاری ہیں، ایف آئی اے کاؤنٹر ٹیررزم ونگ نے کراچی میں اہم کارروائی کرتے ہوئے اسپیشل برانچ پولیس کے اے ایس آئی سید مصور علی نقوی کو گرفتار کرلیا۔

ایف آئی اے کے مطابق ملزم کراچی ایئرپورٹ پر سرویلنس یونٹ میں ڈیوٹی کر رہا تھا، ملزم 1991 میں سندھ پولیس میں بھرتی ہوا تھا جس کو محمود صدیقی کی ہدایت پر رقم فراہم کی جاتی تھی اور ملزم 2008 میں ٹریننگ کے لیے بھارت بھی جا چکا ہے۔

ایف آئی اے کا کہنا تھا کہ گرفتار ملزم کا تعلق ایم کیو ایم لندن سے ہے، ملزم ٹارگٹ کلنگ اور دہشت گردی کی کارروائیوں میں ملوث رہا ہے اور ایئرپورٹ پر ساتھیوں کی آمدورفت میں سہولت کاری بھی کرتا تھا جب کہ گرفتار ملزمان سے جے آئی ٹی تحقیقات کر رہی ہے۔

ایف آئی اے حکام کا کہنا ہے کہ بھارتی خفیہ ایجنسی را کے 6 مبینہ ملزمان پہلے ہی گرفتار ہوچکے ہیں جن میں سے کراچی پولیس کا ایک اے ایس آئی پہلے بھی گرفتار کیا جا چکا ہے۔