بھارتی کشمیر: کٹھوعہ میں جھڑپ، 3 اہلکار اور 3 عسکریت پسند ہلاک ہوگئے

سرینگر (ڈیلی اردو) بھارت کے زیرِ انتظام جموں و کشمیر کے کٹھوعہ میں جاری تصادم میں تین عسکریت پسند مارے گئے ہیں، جبکہ تین پولیس اہلکار ہلاک ہو گئے ہیں۔ اس دوران دو پولیس اہلکار زخمی ہوئے اور ایک فوجی اہلکار بھی زخمی ہو گیا ہے۔ ہلاک ہونے والے پولیس اہلکاروں کی شناخت سارجنٹ سی ٹی طارق حسین، سارجنٹ سی ٹی جسونت سنگھ اور سارجنٹ سی ٹی بالویندر سنگھ کے ناموں سے ہوئی ہے۔ ہلاک ہونے والے تین فوجیوں میں سے دو کٹھوعہ کے رہائشی تھے، جبکہ تیسرے کا تعلق ریاسی سے تھا۔ تصادم کے مقام پر دونوں طرف سے فائرنگ کا سلسلہ جاری ہے۔

کٹھوعہ میں پچھلے چار دنوں سے بڑے پیمانے پر انسداد عسکریت پسند آپریشن جاری ہے، اور یہ انکاؤنٹر اس وقت شروع ہوا جب راج باغ کے گھاٹی جوتھانہ علاقے میں جکھول گاؤں کے قریب سیکورٹی فورسز کا عسکریت پسندوں سے سامنا ہوا۔ یہ مقام ہیرا نگر سیکٹر میں اتوار کو ہونے والے انکاؤنٹر کی جگہ سے تقریباً 30 کلومیٹر دور واقع ہے۔

خیال کیا جا رہا ہے کہ یہ عسکریت پسند اسی گروپ کا حصہ ہیں جو اتوار کی شام ہیرا نگر سیکٹر میں آدھے گھنٹے سے زیادہ جاری رہنے والے انکاؤنٹر کے بعد فرار ہو گئے تھے۔ پولیس کے اسپیشل آپریشنز گروپ (ایس او جی) نے پاکستان کی سرحد کے قریب سانیال گاؤں میں ایک نرسری میں عسکریت پسندوں کی موجودگی کی خفیہ اطلاع ملنے پر کارروائی شروع کی تھی۔

ادھر جموں و کشمیر کے کٹھوعہ ضلع میں اتوار کی شام سیکورٹی فورسز اور عسکریت پسندوں کے ایک گروپ کے درمیان انکاؤنٹر کے دوران ایک نابالغ لڑکی زخمی ہوگئی۔