تربت میں بی ایل اے کمانڈر شہناز بلوچ سے اہلخانہ کی اعلانیہ لاتعلقی

کوئٹہ (ڈیلی اردو) پاکستان کے شورش زدہ صوبہ بلوچستان کے ضلع تربت میں مبینہ طور پر کالعدم بلوچ لبریشن آرمی (بی ایل اے) سے وابستہ خاتون کمانڈر شہناز بلوچ کے اہلخانہ نے ان سے مکمل لاتعلقی کا اعلان کرتے ہوئے کہا ہے کہ گزشتہ 12 برس سے ان کا ان کے ساتھ کوئی رابطہ نہیں۔

تربت پریس کلب میں منعقدہ پریس کانفرنس کے دوران شہناز بلوچ کی والدہ، دادا، ماموں، چچا اور دیگر قریبی رشتہ داروں نے کہا کہ ان کا شہناز بلوچ کے کسی بھی قول، فعل یا مبینہ غیر قانونی سرگرمی سے کوئی تعلق نہیں ہے۔

پریس کانفرنس سے خطاب کرتے ہوئے شہناز بلوچ کی والدہ نے بتایا کہ شہناز کم عمری میں عمان منتقل ہو گئی تھیں اور گزشتہ 12 برس سے خاندان کا ان سے کوئی رابطہ نہیں رہا۔ ان کے مطابق شہناز کے والد کا انتقال اس وقت ہو گیا تھا جب وہ صرف نو ماہ کی تھیں۔

اہلخانہ کا کہنا تھا کہ انہیں کبھی بھی شہناز بلوچ کے کسی شدت پسند تنظیم سے روابط کا علم نہیں تھا اور نہ ہی وہ ایسی سرگرمیوں کی حمایت کرتے ہیں۔

شہناز بلوچ کے چچا اور دیگر رشتہ داروں نے کہا کہ وہ پرامن شہری ہیں، قانون اور ریاستی اداروں کا احترام کرتے ہیں اور ان کا دہشت گردی یا کسی بھی غیر قانونی سرگرمی سے کوئی تعلق نہیں۔

پریس کانفرنس کے دوران اہلخانہ نے شہناز بلوچ سے اپنی لاتعلقی کا اعادہ کرتے ہوئے کہا کہ ان کا خاندان ان کے اقدامات یا سرگرمیوں کا ذمہ دار نہیں ہے۔