تربت میں ڈپٹی کمشنر کے قافلے کے قریب دھماکہ، 8 لیویز اہلکار زخمی

تربت (ڈیلی اردو) پاکستان کے شورش زدہ صوبے بلوچستان کے ضلع کیچ کے ہیڈکوارٹر تربت میں ڈپٹی کمشنر بشیر احمد بڑیچ کے قافلے کے قریب دھماکے کے نتیجے میں لیویز فورس کے آٹھ اہلکاروں سمیت کم از کم نو افراد زخمی ہو گئے ہیں۔ پولیس کے مطابق ڈپٹی کمشنر خود اس حملے میں محفوظ رہے۔

پولیس حکام نے بتایا کہ واقعہ پیر کی صبح اس وقت پیش آیا جب ڈپٹی کمشنر کیچ کا قافلہ دفتر کی جانب روانہ تھا۔ قافلے میں شامل گاڑیاں جب سٹی تھانے کے قریب سے گزریں تو ایک موٹر سائیکل میں نصب دھماکہ خیز مواد زور دار دھماکے سے پھٹ گیا۔

دھماکے سے قافلے کی ایک گاڑی کو شدید نقصان پہنچا جبکہ قریب کھڑی دیگر گاڑیاں بھی متاثر ہوئیں۔ جائے وقوعہ پر لیویز اور پولیس کے دستے پہنچ گئے اور علاقے کو گھیرے میں لے لیا۔

تربت پولیس کے ایس ایچ او عبدالغفار کے مطابق زخمیوں میں ایک عام شہری اور لیویز فورس کے آٹھ اہلکار شامل ہیں۔ زخمیوں کو فوری طور پر تربت ٹیچنگ ہسپتال منتقل کر دیا گیا جہاں انہیں طبی امداد فراہم کی جا رہی ہے۔

ڈی ایس پی تربت نذیر احمد نے ڈیلی اردو سے گفتگو میں بتایا کہ ڈپٹی کمشنر حملے میں محفوظ رہے تاہم ان کے اسکواڈ کی ایک گاڑی براہِ راست دھماکے کی زد میں آئی۔ ان کا کہنا تھا کہ ’’واقعے کی نوعیت کا جائزہ لیا جا رہا ہے، ابتدائی شواہد کے مطابق دھماکہ ریموٹ کنٹرول سے کیا گیا‘‘۔

تاحال کسی بھی گروپ نے اس دھماکے کی ذمہ داری قبول نہیں کی ہے۔

کیچ بلوچستان کا ایک سرحدی ضلع ہے جو ایران سے متصل ہے۔ گزشتہ کئی برسوں سے تربت اور اس کے نواحی علاقے بلوچ عسکریت پسند تنظیموں کی سرگرمیوں کی زد میں رہے ہیں۔ ان تنظیموں نے ماضی میں فورسز پر ہونے والے کئی حملوں کی ذمہ داری قبول کی ہے۔

سیکیورٹی ذرائع کے مطابق بلوچستان کے جنوبی اضلاع، خصوصاً کیچ، پنجگور اور گوادر میں سیکیورٹی فورسز اور سرکاری حکام کو بارودی سرنگوں، فائرنگ اور خودکش حملوں کا سامنا ہے۔ 

صوبائی حکومت کا کہنا ہے کہ غیر قانونی سرحدی نقل و حرکت اور تخریب کار گروہوں کی سرگرمیوں کو روکنے کے لیے ان علاقوں میں سیکیورٹی مزید سخت کی جا رہی ہے۔