ترکیہ کا ایف 16 جنگی طیارہ تربیتی پرواز کے دوران گر کر تباہ ، پائلٹ محفوظ

استنبول(ڈیلی اردو) ترکیہ کے شمال مغربی علاقے یالووا میں ترک فضائیہ کا ایف 16 جنگی طیارہ تربیتی پرواز کے دوران گر کر تباہ ہوگیا، تاہم پائلٹ نے بروقت ایجیکٹ کرکے اپنی جان بچالی۔

ترک وزارت دفاع کے مطابق طیارہ بدھ کے روز تربیتی مشن کے دوران حادثے کا شکار ہوا۔ پائلٹ نے طیارہ زمین سے ٹکرانے سے قبل بحفاظت ایجیکٹ کرلیا اور محفوظ رہا۔ حادثے میں کسی دوسرے شخص کے ہلاک یا زخمی ہونے کی اطلاع نہیں ملی۔

حادثے کے بعد امدادی ٹیمیں فوری طور پر جائے وقوع پر پہنچیں اور پائلٹ کو طبی معائنے کے لیے اسپتال منتقل کردیا گیا۔ حکام نے طیارے کے حادثے کی وجوہات جاننے کے لیے مکمل تحقیقات شروع کرنے کا اعلان کیا ہے۔

ترک میڈیا کے مطابق واقعے کی ویڈیو بھی سامنے آئی ہے، جس میں طیارے کو انتہائی کم بلندی پر پرواز کرتے ہوئے دیکھا جاسکتا ہے۔ طیارہ درختوں کے پیچھے اوجھل ہونے کے چند لمحوں بعد جائے حادثہ سے دھویں کا گہرا بادل اٹھتا دکھائی دیتا ہے۔

یہ حالیہ عرصے میں ترک فضائیہ کے ایف 16 طیارے کا دوسرا بڑا حادثہ بتایا جا رہا ہے۔ اس سے قبل تقریباً چھ ماہ پہلے بھی ایک ترک ایف 16 طیارہ بلغاریہ کی سرحد کے قریب الرٹ رسپانس مشن کے دوران گر کر تباہ ہوا تھا، جس میں پائلٹ ہلاک ہوگیا تھا۔

ترکیہ کو اس سے قبل فوجی مال بردار طیارے کے حادثے کا بھی سامنا کرنا پڑا تھا، جس کے بعد حکام نے حفاظتی اقدامات کے تحت سی 130 طیاروں کی پروازیں عارضی طور پر روک دی تھیں۔