جرمنی: شرپسندوں کے ایک ہفتے میں 7 مساجد پر حملے، قرآنی نسخے شہید کر دیئے

برلن (ویب ڈیسک) جرمنی کے شہر مونسٹر کے قریب واقع منڈن نامی قصبے میں نامعلوم شرپسندوں نے مسجد پر حملہ کر دیا، مسجد کی بے حرمتی کرتے ہوئے نقصان پہنچایا اور وہاں موجود قرآن پاک کے نسخوں کو شہید کردیا۔

جرمن میڈیا کی رپورٹ کے مطابق مجرمانہ اور شرپسندانہ ذہنیت کے حامل افراد نے ترک اسلامی انجمن کے زیر انتظام منڈن باروس جامع مسجد پہ حملہ کرنے کے دوران انسانی غلاظت پھیلائی اور مسجد کو نقصان پہنچایا۔ علاقہ پولیس نے اس ضمن میں تحریری رپورٹ ملنے کے بعد تفتیش و تحقیق شروع کردی ہے۔

گزشتہ 10 دنوں کے دوران 7 مساجد کو حملہ آوروں نے نشانہ بنایا ہے، مغربی ممالک میں مسلمانوں اور ان کی مذہبی عبادت گاہوں سمیت دیگر املاک کو نشانہ بنانے میں گزشتہ کئی ماہ سے تیزی دیکھنے میں آئی ہے۔

نسل پرست اور مذہبی منافرت پر یقین رکھنے والوں اور اس پر عمل کرنے والوں کے خلاف مغربی ممالک کی پولیس اور شہری انتظامیہ نے خاطر خواہ اقدامات بھی اٹھائے ہیں مگر اس کے باوجود اس قسم کے سانحات رونما ہورہے ہیں۔