جنوبی وزیرستان میں نامعلوم افراد کی فائرنگ، 2 افراد ہلاک

جنوبی وزیرستان (ڈیلی اردو رپورٹ) پاکستان کے شورش زدہ صوبہ خیبر پختونخوا کے قبائلی ضلع جنوبی وزیرستان کے علاقے سراروغہ کے کوٹکئی بازار میں نامعلوم موٹر سائیکل سواروں کی فائرنگ کے نتیجے میں دو افراد ہلاک ہو گئے۔

پولیس ذرائع کے مطابق مسلح افراد نے کوٹکئی بازار میں دو افراد کو نشانہ بنایا اور فائرنگ کے بعد موقع سے فرار ہونے میں کامیاب ہو گئے۔

پولیس نے بتایا کہ ہلاک ہونے والوں کی شناخت سردار سرحدی اور احمد کے ناموں سے ہوئی ہے۔ دونوں کی لاشیں ضروری کارروائی کے لیے قریبی ہسپتال منتقل کر دی گئی ہیں۔

واقعے کی اطلاع ملتے ہی پولیس اور دیگر قانون نافذ کرنے والے اداروں کے اہلکار جائے وقوعہ پر پہنچ گئے اور علاقے کو گھیرے میں لے کر شواہد اکٹھے کیے۔

پولیس نے واقعے کا مقدمہ روزنامچہ میں درج کر کے تحقیقات شروع کر دی ہیں۔ پولیس ذرائع کے مطابق فائرنگ کے محرکات کا تعین اور حملہ آوروں کی گرفتاری کے لیے مختلف پہلوؤں سے تفتیش جاری ہے۔