جنوبی وزیرستان میں سکیورٹی فورسز کا آپریشن، پاکستانی طالبان کے مرکز سے 16 آئی ای ڈیز برآمد

وانا (ل و) پاکستان کے شورش زدہ صوبے خیبر پختونخوا کے قبائلی ضلع جنوبی وزیرستان کے علاقے وانا میں سکیورٹی فورسز اور پولیس نے مشترکہ سرچ آپریشن کے دوران بڑی کارروائی کرتے ہوئے کالعدم تنظیم کے ایک مرکز سے 16 عدد دیسی ساختہ بم (آئی ای ڈیز) برآمد کر لیے ہیں۔

ذرائع کے مطابق یہ کارروائی قلندر آباد ٹاور کے قریب کی گئی جہاں کالعدم تنظیم کے کمانڈر ملنگ وزیر کے زیر استعمال ایک مرکز کی نشاندہی ہوئی۔ فورسز نے چھاپہ مار کر مرکز سے آئی ای ڈیز کو برآمد کیا، جنہیں بعد ازاں بم ڈسپوزل یونٹ نے ناکارہ بنایا۔

سیکیورٹی حکام کا کہنا ہے کہ علاقے میں مزید سرچ آپریشن جاری ہیں تاکہ ممکنہ دہشت گردی کے خطرات کو مکمل طور پر ختم کیا جا سکے۔

تیارزہ میں فائرنگ سے دو افراد کی ٹارگٹ کلنگ

دوسری جانب جنوبی وزیرستان کی تحصیل تیارزہ کے علاقے خیسورہ میں نامعلوم مسلح افراد نے فائرنگ کر کے ملک رابوت خان سمیت دو افراد کو ہلاک کر دیا۔

پولیس کے مطابق حملہ آور فائرنگ کے بعد فرار ہونے کی کوشش کر رہے تھے کہ ان کی موٹرسائیکل تیز رفتاری کے باعث بے قابو ہو کر گر گئی۔ حادثے کے نتیجے میں ایک حملہ آور زخمی ہوا اور موقع پر ہی ہلاک ہو گیا۔

پولیس نے ہلاک ہونے والے حملہ آور کی شناخت شروع کر دی ہے اور واقعہ گاؤں شین غونڈائی میں پیش آیا۔ علاقے میں فوری طور پر سرچ آپریشن شروع کر دیا گیا ہے۔

سیکیورٹی ذرائع کا کہنا ہے کہ یہ واقعہ ٹارگٹ کلنگ کے زمرے میں آتا ہے اور تحقیقات جاری ہیں۔