جنوبی وزیرستان میں سکیورٹی پوسٹ پر خودکش حملہ ناکام، 4 دہشت گرد ہلاک

وانا (ڈیلی اردو) پاکستان کے شورش زدہ صوبہ خیبرپختونخوا کے قبائلی ضلع جنوبی وزیرستان کے علاقے وانا کے کری کوٹ میں سکیورٹی فورسز نے خودکش حملے کی کوشش ناکام بناتے ہوئے چار دہشت گردوں کو ہلاک کر دیا۔ 

سکیورٹی ذرائع کے مطابق دہشت گردوں نے بارود سے بھری گاڑی کے ذریعے سکیورٹی فورسز کی پوسٹ کو نشانہ بنانے کی کوشش کی تھی۔

پاکستان کالعدم تحریک طالبان پاکستان (ٹی ٹی پی) سے تعلق رکھنے والے عسکریت پسندوں کے لیے "خوارج" کی اصطلاح استعمال کرتا ہے۔

سکیورٹی ذرائع کے مطابق فتنہ الخوارج سے وابستہ دہشت گردوں نے کری کوٹ پوسٹ پر حملے کے لیے خودکش گاڑی استعمال کی، تاہم سکیورٹی فورسز کے الرٹ اور مؤثر دفاعی نظام نے بروقت کارروائی کرتے ہوئے حملہ آور گاڑی کو نشانہ بنا دیا، جس کے نتیجے میں خودکش حملے کی کوشش ناکام ہو گئی۔

سکیورٹی حکام کے مطابق کارروائی کے دوران فورسز کو کسی قسم کا جانی نقصان نہیں پہنچا۔ حملے کی کوشش ناکام بنانے کے بعد دہشت گردوں اور سکیورٹی اہلکاروں کے درمیان فائرنگ کا تبادلہ ہوا، جس میں خودکش حملہ آور سمیت چار دہشت گرد ہلاک ہو گئے۔

حکام کا کہنا ہے کہ ہلاک دہشت گردوں کا تعلق فتنہ الخوارج سے تھا، جبکہ علاقے میں موجود دیگر ممکنہ دہشت گردوں کی تلاش کے لیے سرچ اینڈ کلیئرنس آپریشن جاری ہے۔

سکیورٹی ذرائع کے مطابق کری کوٹ وانا پوسٹ علاقے میں امن و امان برقرار رکھنے اور شہریوں کے تحفظ کے لیے اہم کردار ادا کر رہی ہے۔ یہ پوسٹ دہشت گرد عناصر کی نقل و حرکت کی نگرانی اور وانا بازار کی جانب ممکنہ پیش قدمی روکنے میں بھی مؤثر ثابت ہو رہی ہے، جس کے باعث دہشت گردوں نے اسے نشانہ بنانے کی کوشش کی۔

حکام کے مطابق کالعدم ٹی ٹی پی سے وابستہ دہشت گرد گروہ حالیہ کارروائیوں میں ناکامیوں کے بعد سکیورٹی فورسز کو نقصان پہنچانے کی کوشش کر رہے ہیں، تاہم بروقت کارروائیوں کے باعث ان کے عزائم ناکام بنائے جا رہے ہیں۔