حلب میدانِ جنگ بن گیا، شامی افواج اور کرد جنگجوؤں میں خونریز لڑائی

دمشق (ڈیلی اردو/ڈی پی اے) شام کے شمالی شہر حلب میں منگل کے روز کرد جنگجوؤں اور شامی سرکاری افواج کے درمیان شدید جھڑپیں ہوئیں، جن میں جانی نقصان کی اطلاعات ہیں۔ فریقین نے تشدد کا ذمہ دار ایک دوسرے پر عائد کیا ہے۔ یہ جھڑپیں کرد انٹرنل سکیورٹی فورسز، جو سیریئن ڈیموکریٹک فورسز (ایس ڈی ایف) سے وابستہ ہیں، اور شامی حکومت کی اتحادی افواج کے درمیان ہوئیں۔ 

شامی سرکاری میڈیا کے مطابق، ایس ڈی ایف کی جانب سے حلب میں شیحان راؤنڈ اباؤٹ کے قریب علاقے کو نشانہ بنانے کے نتیجے میں وزارت دفاع کا ایک اہلکار ہلاک جبکہ تین دیگر زخمی ہو گئے۔ 

ہسپتال ذرائع نے جرمن خبر رساں ادارے ڈی پی اے کو بتایا کہ رہائشی علاقوں پر گولہ باری کے دوران دو خواتین ہلاک اور ایک بچہ زخمی ہوا۔ شامی خانہ جنگی پر نظر رکھنے والی تنظیم سیریئن آبزرویٹری فار ہیومن رائٹس کے مطابق، گولہ باری سے بالخصوص گنجان آباد علاقوں میں شدید خوف و ہراس پھیل گیا۔ 

دوسری جانب ایس ڈی ایف کے ترجمان فرہاد الشامی نے ڈی پی اے کو بتایا کہ حکومت کے زیرِ اثر مسلح گروہوں، جن میں سلیمان شاہ ڈویژن، حمزہ ڈویژن اور سلطان مراد دھڑا شامل ہیں، نے حملے کیے۔ ان کے مطابق ان حملوں میں ایک شہری ہلاک اور دو زخمی ہوئے۔ ایس ڈی ایف نے ترکی کے اتحادی ان مسلح گروہوں پر الزام عائد کیا کہ انہوں نے حلب صوبے کے مختلف علاقوں میں مارٹر گولوں، بھاری ہتھیاروں اور ڈرونز کے ذریعے حملے کیے۔