خیبر پختونخوا میں سیکیورٹی فورسز کی کارروائیاں، بھارت حمایت یافتہ 9 شدت پسند ہلاک

راولپنڈی (ک م) خیبر پختونخوا کے مختلف اضلاع میں سیکیورٹی فورسز نے انٹیلی جنس بنیاد پر کارروائیاں کرتے ہوئے بھارت حمایت یافتہ 9 شدت پسندوں کو ہلاک کر دیا۔ پاکستانی فوج کے شعبہ تعلقات عامہ (آئی ایس پی آر) کے مطابق مارے گئے شدت پسند دہشتگردی کی متعدد وارداتوں میں ملوث تھے۔

آئی ایس پی آر کے مطابق پہلا آپریشن ضلع ڈیرہ اسماعیل خان میں کیا گیا، جہاں بھارتی حمایت یافتہ شدت پسندوں کی موجودگی کی اطلاع پر خفیہ کارروائی کے دوران فائرنگ کے تبادلے میں چار شدت پسند مارے گئے۔

دوسرا آپریشن ضلع ٹانک میں کیا گیا، جس میں سیکیورٹی فورسز نے مزید دو شدت پسندوں کو ہلاک کیا۔

تیسری جھڑپ ضلع خیبر کے علاقے باغ میں ہوئی، جہاں سیکیورٹی فورسز نے کامیاب کارروائی کرتے ہوئے تین شدت پسندوں کو ہلاک کر دیا۔

بیان میں کہا گیا ہے کہ ہلاک شدت پسندوں سے اسلحہ اور بھاری مقدار میں گولہ بارود بھی برآمد کیا گیا ہے، جبکہ مزید شدت پسندوں کی تلاش کے لیے علاقوں میں سرچ آپریشن جاری ہے۔

آئی ایس پی آر کا کہنا ہے کہ پاکستان کی سیکیورٹی فورسز ملک کو دہشتگردی، بالخصوص بھارتی حمایت یافتہ شدت پسندی سے پاک کرنے کے لیے پرعزم ہیں۔