خیبرپختونخوا: 1,349 مطلوب دہشت گرد، سروں کی قیمت کروڑوں روپے

پشاور (ڈیلی اردو) خیبرپختونخوا حکومت نے صوبے کے انتہائی مطلوب اور اشتہاری دہشت گردوں کی تازہ فہرست تیار کرلی ہے، جس میں 1,349 دہشت گردوں کے کوائف شامل ہیں۔ یہ فہرست صوبائی انتظامیہ اور حساس اداروں نے مشترکہ طور پر تیار کی اور اسے وفاقی وزارت داخلہ کو ارسال کر دیا گیا ہے۔

ڈیلی اردو کے مطابق فہرست میں شامل درجنوں خطرناک دہشت گردوں کے سروں کی قیمتیں مقرر کی گئی ہیں، جن میں 59 دہشت گردوں کے سر کی قیمت ایک سے تین کروڑ روپے کے درمیان رکھی گئی ہے۔ فہرست میں کرم کے کاظم خان کے سر کی قیمت 3 کروڑ روپے، کمانڈر امجد اللہ کی 2 کروڑ روپے اور باجوڑ کے مولوی فقیر محمد کی ڈیڑھ کروڑ روپے مقرر کی گئی ہے۔

رپورٹ کے مطابق فہرست میں شامل دہشت گردوں کا تعلق پشاور، ڈیرہ اسماعیل خان، سوات، باجوڑ اور کرم سمیت مختلف اضلاع سے ہے۔ یاد رہے کہ 15 ستمبر 2025 کو کاؤنٹر ٹیررازم ڈیپارٹمنٹ (سی ٹی ڈی) نے ایک رپورٹ میں انکشاف کیا تھا کہ صوبے میں 1,351 خطرناک اور انتہائی مطلوب دہشت گرد موجود ہیں، جن کے سروں کی مجموعی قیمت 4 ارب 14 کروڑ 10 لاکھ روپے مقرر کی گئی تھی۔

ڈیلی اردو کے مطابق، آج باجوڑ میں سیکیورٹی فورسز کے آپریشن میں مارے گئے کمانڈر امجد کا نام بھی اسی فہرست میں شامل تھا۔ فہرست کے مطابق، کمانڈر امجد کا نام 605ویں نمبر پر درج ہے۔