دادو: مسافر وین اور ڈمپر میں خوفناک تصادم، 6 افراد جاں بحق، 17 افراد زخمی

دادو (ڈیلی اردو ) جامشورو انڈس ہائی وے پر مسافر وین اور ڈمپر میں تصادم کے نتیجے میں 6 افراد جاں بحق اور 17 افراد شدید زخمی ہوگئے۔

تفصیلات کے مطابق جامشورو انڈس ہائی وے پر مسافر وین اور ڈمپر میں تصادم کے نتیجے میں 6 افراد موقع پر جاں بحق ہوگئے ۔ حادثے کا شکار ہونے والی مسافر وین سیہون سے جامشورو جارہی تھی جبکہ ڈمپر جامشورو سے سیہون جارہا تھا، جن کے درمیان عَمری ٹاؤن میں تصادم ہوا۔ تصادم کے نتیجے میں 6 افراد موقع پر ہی جاں بحق جبکہ 17 زخمی ہوئے۔

حادثے میں جاں بحق ہونے والے افراد میں سے 2 کی شناخت رحیم سولنگی اور محمد امین مَچھی کے ناموں سے ہوئی۔

سینئر سپرنٹنڈنٹ پولیس (ایس ایس پی) جامشورو توقیر محمد نعیم نے کہا کہ زخمی افراد کو سَن، منجھنڈ اور سیہون کے ہسپتالوں میں منتقل کیا گیا جہاں ان کا علاج جارہی ہے۔

ان کا کہنا تھا کہ لاشوں کو سیہون کے سید عبداللہ شاہ انسٹی ٹیوٹ آف میڈیکل اینڈ ہیلتھ سائنسز منتقل کیا گیا۔

واضح رہے کہ اندرون سندھ میں اکثر تیز رفتاری اور ڈارئیورز کی غفلت کے باعث حادثات پیش آتے رہتے ہیں جو جان لیوا ثابت ہوتے ہیں۔