رفال طیاروں کی صلاحیت پاکستانی فضائیہ کے سامنے صفر ثابت ہوئی، ایئر چیف مارشل ظہیر بابر سدھو

رسالپور (ڈیلی اردو) پاکستان فضائیہ کے سربراہ ایئر چیف مارشل ظہیر احمد بابر سدھو نے کہا ہے کہ چھ اور سات مئی کی رات پاکستان نے انڈیا کے رفال طیاروں سمیت متعدد طیارے مار گرائے، اور رفال طیاروں کی صلاحیت پاکستان فضائیہ کے سامنے مکمل طور پر ناکام ثابت ہوئی۔

خیبر پختونخوا کے ضلع نوشہرہ کے شہر رسالپور میں پی اے ایف کی اصغر خان اکیڈمی میں گریجویشن پریڈ سے خطاب کرتے ہوئے انہوں نے کہا کہ جب پاکستان کی خود مختاری کو چیلنج کیا گیا تو فضائیہ نے بھرپور جواب دیتے ہوئے انڈیا کے جدید لڑاکا طیاروں کو گرایا۔ ایئر چیف نے کہا کہ “انڈیا کی ہر حرکت کو پاکستانی فضائیہ نے لمحوں میں مانیٹر کیا اور ہمارے ایکشن اور آپریشن فوری اور مؤثر ثابت ہوئے۔”

انھوں نے مزید کہا کہ “دنیا اس کی توقع نہیں کر رہی تھی، لیکن پاکستانی فضائیہ نے یہ کر دکھایا اور دنیا حیران رہ گئی۔ ہم انڈیا کو مزید نقصان پہنچا سکتے تھے، لیکن ہمارا ایکشن پروفیشنل، متوازن اور کیلکولیٹڈ ہوتا ہے جس کا مقصد عزت کے ساتھ امن قائم رکھنا ہے۔”

ایئر چیف نے بتایا کہ معرکہ حق میں پاکستان ایئر فورس کی کامیابی اور جدید وارفیئر صلاحیتوں کو بین الاقوامی سطح پر تسلیم کیا گیا اور اس پر اسٹڈی بھی کی جا رہی ہے۔ انہوں نے فیلڈ مارشل سید عاصم منیر کے معرکہ حق میں قائدانہ کردار کو بھی سراہا۔