روس نے اکتوبر میں یوکرین پر 5,298 ڈرونز اور 270 میزائل داغے

کییف (ڈیلی اردو/اے ایف پی) روس نے اکتوبر کے مہینے میں یوکرین پر ریکارڈ تعداد میں میزائل حملے کیے، جو 2023 کے آغاز سے کسی بھی ایک ماہ میں کیے گئے حملوں کی سب سے زیادہ تعداد ہے۔ تازہ حملوں میں یوکرین کے توانائی کے بنیادی ڈھانچے (انرجی گرڈ) کو مرکزی ہدف بنایا گیا۔

اے ایف پی کے اعداد و شمار کے تجزیے کے مطابق، روسی فوج نے اکتوبر کے دوران 270 میزائل فائر کیے، جو ستمبر کے مقابلے میں 46 فیصد زیادہ ہیں۔ ماہرین کے مطابق یہ اضافہ موسمِ سرما کے قریب آتے ہی یوکرین کے بجلی کے نظام کو مفلوج کرنے کی نئی مہم کا حصہ ہے۔

یوکرینی حکام نے ان حملوں کو ’’عام آبادی کو مشکلات میں ڈالنے کی سوچی سمجھی حکمتِ عملی‘‘ قرار دیتے ہوئے کہا کہ روس مسلسل چوتھے سردیوں کے موسم میں یوکرین کے توانائی نظام کو نشانہ بنا رہا ہے، جس کے نتیجے میں ملک کے مختلف حصوں میں وسیع پیمانے پر بلیک آؤٹس دیکھنے میں آئے۔

یوکرینی صدر وولودیمیر زیلنسکی نے روس پر الزام عائد کیا کہ وہ ملک کے انرجی گرڈ پر حملوں کے ذریعے ’’افراتفری‘‘ اور ’’خوف‘‘ پیدا کرنا چاہتا ہے۔ توانائی کی شدید قلت کے باعث کییف سمیت بیشتر علاقوں میں لوڈشیڈنگ کا نظام نافذ کر دیا گیا ہے۔

دوسری جانب، دی ہیگ میں قائم بین الاقوامی فوجداری عدالت (ICC) نے روسی فوج کے اعلیٰ عہدیداروں کے خلاف توانائی تنصیبات پر حملوں کے باعث شہریوں کو نقصان پہنچانے کے جنگی جرم کے الزام میں گرفتاری وارنٹ جاری کر رکھے ہیں۔

اعداد و شمار کے مطابق، روس نے اکتوبر میں 5,298 ڈرونز بھی داغے، جبکہ یوکرینی فورسز نے جوابی کارروائی میں روسی تیل کے ڈپوز اور ریفائنریوں کو نشانہ بنایا۔