روس کا یوکرین پر 36 میزائلوں اور 600 ڈرونز سے بڑا حملہ، 3 افراد ہلاک

کییف (ڈیلی اردو) یوکرین کے مطابق روس کی جانب سے رات بھر جاری رہنے والے بڑے پیمانے کے حملوں میں کم از کم تین افراد ہلاک اور تقریباً 30 زخمی ہو گئے، جبکہ توانائی کی تنصیبات کو نشانہ بنانے کے نتیجے میں چھ لاکھ سے زائد گھرانوں کی بجلی منقطع ہو گئی۔

یہ حملے ایک ایسے وقت میں کیے گئے ہیں جب امریکہ کییف اور ماسکو کے درمیان ممکنہ امن مذاکرات کی راہ ہموار کرنے کی کوشش کر رہا ہے۔

یوکرین کی وزارتِ خارجہ نے اپنے بیان میں کہا کہ ”جب دنیا امن منصوبوں پر بحث کر رہی ہے، روس اپنے ’جنگی منصوبے‘ پر عمل کر رہا ہے: قتل اور تباہی۔‘‘

کییف کے رہائشی رات بھر کے دھماکوں کے بعد تباہ شدہ مقامات کا جائزہ لیتے نظر آئے۔ یوکرین کے صدر ولودیمیر زیلنسکی نے بتایا کہ روس نے حملے میں تقریباً 36 میزائل اور قریب 600 ڈرون استعمال کیے۔

سن 2022 سے روس یوکرین کی توانائی کے ڈھانچے کو نشانہ بناتا آ رہا ہے، تاہم رواں خزاں کے حملوں نے کییف سمیت متعدد شہروں میں زندگی مشکل بنا دی ہے۔ بعض دنوں میں گھروں کو صرف آٹھ گھنٹے کے لیے بجلی ملتی ہے، شہر کی گلیاں تاریکی میں ڈوبی رہتی ہیں اور جنریٹروں کا شور معمول بن چکا ہے۔

یوکرین کی وزارتِ توانائی کے مطابق تازہ حملوں میں کییف سمیت پانچ صوبوں کی توانائی تنصیبات کو نشانہ بنایا گیا، جس کے نتیجے میں بجلی سے محروم ہونے والے چھ لاکھ گھرانوں میں سے پانچ لاکھ سے زائد صرف دارالحکومت میں تھے۔