سری لنکا: متنازع مذہبی پیشوا کو توہین اسلام پر جیل بھیج دیا گیا

کولمبو (ڈیلی اردو/بی بی سی/اے ایف پی/رائٹرز) سری لنکا سے تعلق رکھنے والے ایک سخت گیر راہب گلاگوداتے گننسرا کو اسلام کی تضحیک اور مذہبی منافرت پھیلانے کے الزام میں نو ماہ قید کی سزا سنائی گئی ہے۔ انھیں سابق سری لنکن صدر گوٹابیا راجاپکشے کا قریبی ساتھی سمجھا جاتا ہے۔

2016 میں دیے گئے متنازع بیان پر گننسرا کو جمعرات کے روز سزا سنائی گئی۔

اشتعال انگیزی اور توہین عدالت پر گننسرا کو چھ سال قید کی سزا ہوئی تھی مگر انھیں 2019 میں صدارتی معافی مل گئی تھی۔ لیکن اس بار انھیں کولمبو کی مجسٹریٹ عدالت نے نو ماہ قید کی سزا سنائی اور جیل بھیج دیا۔

گلاگوداتے گننسرا پر 1500 سری لنکن روپے کا جرمانہ بھی عائد کیا گیا ہے۔ جرمانہ ادا نہ کرنے کی صورت میں انھیں مزید ایک ماہ جیل میں رہنا پڑے گا۔

سری لنکا میں بدھ مت کے راہبوں کو بہت کم سزائیں سنائی جاتی ہیں۔ لیکن گننسرا کو دوسری بار قید کی سزا ہوئی ہے۔ ان پر مسلسل یہ الزام لگتا ہے کہ وہ لوگوں کو مسلم مخالف تشدد پر اکساتے ہیں۔

بدھ راہب جو سابق صدر کے قریبی ساتھی ہیں

2016 میں ایک میڈیا کانفرنس کے دوران گننسرا نے اسلام مخالف بیان دیا تھا۔ اس الزام میں انھیں دسمبر 2024 میں گرفتار کیا گیا تھا۔

جمعرات کو انھیں سزا سناتے ہوئے عدالت نے کہا کہ سری لنکا میں کوئی شخص چاہے کسی بھی مذہب سے تعلق رکھتا ہو، آئین اسے اپنے مذہب پر عمل کرنے کی مکمل آزادی دیتا ہے۔

گننسرا نے اپنی سزا کے خلاف اپیل دائر کی تھی۔ لیکن عدالت نے ان کی ضمانت کی درخواست مسترد کر دی۔

گننسرا سابق صدر راجاپکشے کے قابل اعتماد ساتھی رہے ہیں۔

2022 میں سری لنکا میں معاشی بحران سے پریشان لوگوں نے بڑے پیمانے پر احتجاج شروع کیے جس کے بعد راجاپکشے کو استعفیٰ دینا پڑا۔

راجاپکشا کی صدارت کے دوران گننسرا کو ملک میں مذہبی اتحاد کو برقرار رکھنے کے لیے بنائی گئی ٹاسک فورس کا چیئرمین بنایا گیا تھا۔

یہ ٹاسک فورس مذہبی اتحاد کو برقرار رکھنے کے لیے قانون میں اصلاحات تجویز کرنے کی ذمہ دار تھی۔

صدارتی معافی

راجاپکشے کی حکومت کے خاتمے کے بعد گننسرا کو گذشتہ سال مسلمانوں کے خلاف نفرت انگیز تقاریر سے متعلق ایک مقدمے میں چار سال قید کی سزا سنائی گئی تھی۔ لیکن اس وقت انھیں ضمانت مل گئی۔

2018 میں بھی گننسرا کو توہین عدالت اور سیاسی مسائل پر کارٹون بنانے والے کارٹونسٹ کی اہلیہ کو دھمکیاں دینے کے جرم میں چھ سال قید کی سزا سنائی گئی تھی۔

خیال کیا جاتا ہے کہ کارٹونسٹ اس کے بعد غائب ہوگئے تھے۔

تاہم انھوں نے صرف نو ماہ کی سزا پوری کی کیونکہ اس وقت کے صدر میتھری پالا سری سینا نے انھیں صدارتی معافی دے دی تھی۔