سعودی عرب میں امریکن قونصلیٹ پر فائرنگ، 2 افراد ہلاک

جدہ (ڈیلی اردو/وی او اے) سعودی عرب میں امریکی قونصلیٹ کے باہر فائرنگ کے تبادلے پر امریکہ کے محکمۂ خارجہ نے اپنے بیان میں کہا ہے کہ اس واقعہ میں کسی امریکی کو نقصان نہیں پہنچا۔

سعودی عرب میں بدھ کو امریکی قونصلیٹ کے باہر ایک مسلح شخص اور سعودی سیکیورٹی اہلکاروں کے درمیان فائرنگ کا تبادلہ ہوا جس میں دو افراد ہلاک ہوئے ہیں۔ ہلاک ہونے والوں میں ایک مسلح شخص اور دوسرا قونصلیٹ کا نیپالی گارڈ تھا۔

مکّہ ریجن کی پولیس کے ترجمان نے واقعہ کی تفصیلات بتاتے ہوئے کہا ہے کہ ایک شخص نے جدہ میں امریکی قونصلیٹ کے باہر گاڑی روکی اور اسلحہ لے کر گاڑی سے باہر نکلا۔ سیکیورٹی اہلکاروں نے اسے روکنے کی کوشش کی جس کے بعد فائرنگ کے تبادلے میں وہ شخص ہلاک ہو گیا۔

فائرنگ سے قونصلیٹ کا ایک گارڈ بھی زخمی ہوا جو بعد ازاں دم توڑ گیا۔ مقامی پولیس حکام کا کہنا ہے کہ واقعے کی تحقیقات کی جا رہی ہیں۔

امریکی محکمۂ خارجہ نے واقعہ پر بیان جاری کرتے ہوئے کہا ہے کہ امریکی سفارت خانہ اور قونصلیٹ سعودی حکام سے رابطے میں ہیں جو واقعہ کی تحقیقات کر رہے ہیں۔

واضح رہے کہ سعودی عرب میں امریکی قونصلیٹ پر متعدد بار حملے ہو چکے ہیں۔ سن 2016 میں قونصلیٹ کے نزدیک دھماکے میں ایک خودکش بمبار ہلاک اور دو افراد زخمی ہوگئے تھے۔

سن 2004 میں 5 افراد نے بم اور بندوقوں کے ساتھ قونصلیٹ پر دھاوا بول دیا تھا جس میں 4 سعودی سیکیورٹی اہلکار اور 5 مقامی ملازم ہلاک ہوگئے تھے۔ حملہ آوروں میں سے 3 کو ہلاک اور 2 کو گرفتار کر لیا گیا تھا۔