سندھ: شکارپور میں ریلوے ٹریک اڑا دیا، ٹرین تباہی سے بال بال بچ گئی

شکارپور (ڈیلی اردو) پاکستان کے صوبہ سندھ کے ضلع شکارپور کے قریبی علاقے ہمایوں کے نزدیک ریلوے ٹریک دھماکے سے متاثر ہو گیا۔

سینئر سپرنٹنڈنٹ آف پولیس (ایس ایس پی) شاہزیب چاچڑ نے ریلوے ٹریک پر دھماکے کی تصدیق کرتے ہوئے بتایا کہ دھماکے کے نتیجے میں ٹریک کو جزوی نقصان پہنچا ہے۔

پولیس حکام کے مطابق دھماکے سے کچھ دیر قبل جیکب آباد سے کراچی جانے والی سکھر ایکسپریس اسی ٹریک سے گزری تھی، تاہم خوش قسمتی سے کوئی جانی نقصان رپورٹ نہیں ہوا۔

ایس ایس پی کے مطابق دھماکے کے بعد خوشحال خان خٹک ایکسپریس کو جیکب آباد ریلوے اسٹیشن پر روک دیا گیا ہے جبکہ بم ڈسپوزل اسکواڈ کو سکھر سے طلب کر لیا گیا ہے تاکہ علاقے کی مکمل کلیئرنس کی جا سکے۔

حکام کا کہنا ہے کہ سیکیورٹی اداروں نے علاقے کو گھیرے میں لے کر تحقیقات شروع کر دی ہیں، جبکہ ریلوے ٹریک کی مرمت کے بعد ٹرین سروس بحال کی جائے گی۔