سندھ: کراچی میں سی ٹی ڈی کی کارروائی، دو دہشت گرد گرفتار

کراچی (ڈیلی اردو) پاکستان کے صوبہ سندھ کے دارالحکومت کراچی میں کاؤنٹر ٹیررازم ڈیپارٹمنٹ (سی ٹی ڈی) اور حساس ادارے کی مشترکہ کارروائی کے دوران دو مبینہ دہشت گردوں کو گرفتار کر لیا گیا ہے۔

سی ٹی ڈی کے مطابق یہ کارروائی خفیہ اطلاعات کی بنیاد پر کی گئی، جس میں ملزمان کو شہر کے مختلف علاقوں سے حراست میں لیا گیا۔ گرفتار افراد کی شناخت اللہ ڈنو ولد غلام محمد اور فراز احمد عرف طوطو کے ناموں سے ہوئی ہے۔

حکام کا کہنا ہے کہ ملزمان کا تعلق کالعدم سندھودیش ریوولیوشنری آرمی سے ہے۔

کارروائی کے دوران ملزمان کے قبضے سے اسلحہ، گولیاں اور دھماکا خیز مواد بھی برآمد کیا گیا، جسے فرانزک جانچ کے لیے بھجوا دیا گیا ہے۔ حکام کے مطابق یہ مواد ممکنہ طور پر حساس مقامات پر حملوں میں استعمال ہونا تھا۔

سی ٹی ڈی حکام کے مطابق گرفتار ملزم فراز احمد عرف طوطو اس سے قبل بھی مختلف مقدمات میں قانون نافذ کرنے والے اداروں کو مطلوب رہا ہے اور اس پر حساس تنصیبات پر حملوں کی منصوبہ بندی سمیت سنگین الزامات ہیں۔

ابتدائی تفتیش میں ملزم نے اپنے ساتھیوں کے ساتھ مختلف کارروائیوں میں ملوث ہونے کا اعتراف کیا ہے، تاہم مزید تحقیقات جاری ہیں۔

حکام کا کہنا ہے کہ گرفتار افراد کے خلاف انسدادِ دہشت گردی ایکٹ اور دیگر دفعات کے تحت مقدمات درج کر لیے گئے ہیں اور قانونی کارروائی جاری ہے۔