سی ٹی ڈی پنجاب کا انٹیلی جنس بیسڈ آپریشن، 23 دہشت گرد گرفتار

لاہور (بیورو رپورٹ) کاؤنٹر ٹیررزم ڈیپارٹمنٹ (سی ٹی ڈی) نے پنجاب کے مختلف اضلاع میں کارروائی کرتے ہوئے 23 دہشت گردوں کو گرفتار کر لیا۔

سی ٹی ڈی کے ترجمان کے مطابق یہ کارروائیاں لاہور، گوجرانوالہ، میانوالی، بہاولپور، راولپنڈی، راجن پور، سیالکوٹ، فیصل آباد، چینوٹ، بہاول نگر اور رحیم یار خان میں کی گئی۔ ترجمان سی ٹی ڈی کا کہنا ہے کہ لاہور سے ٹی ٹی پی اور فیصل آباد سے القاعدہ کے اہم سہولت کار کو گرفتار کرلیا گیا۔

ترجمان سی ٹی ڈی کا کہنا تھا کہ دہشت گردوں کی شناخت عبدالکریم، غفران، کامران، شاہ محمد، شاکر، عمران، شاہی محمد، انصاف اللہ، سمر خان، اسلم اور قدوس وغیرہ کے نام سے ہوئی۔ گرفتار دہشت گردوں کا تعلق کالعدم تنظیموں سے ہے۔

گرفتار دہشت گردوں کے قبضے سے دھماکہ خیز مواد، ہینڈ گرنیڈ 2 ڈیٹونیٹر، حفاظتی فیوز وائر 51 فٹ اسلحہ، گولیاں اور نقدی برآمد کرلی گئی۔

ترجمان سی ٹی کے مطابق دہشت گرد مختلف اداروں پر حملے کی منصوبہ بندی کر رہے تھے۔

رواں ہفتے 962 کومبنگ آپریشنز کے دوران 133 مشتبہ افراد گرفتار کیے گئے، کومبنگ آپریشنز میں 37739 افراد سے پوچھ گچھ کی گئی۔ سی ٹی ڈی محفوظ پنجاب کے ہدف پر عمل پیرا ہے، دہشت گردی کے ناسور کو جڑ سے اکھاڑ پھینکنے کے لیے پرعزم ہیں۔