سیالکوٹ: چائلڈ پورنو گرافی میں ملوث بین الاقوامی گروہ کا ملزم گرفتار

سیالکوٹ (ڈیلی اردو) ایف آئی اے سائبر کرائم نے صوبہ پنجاب کے ضلع سیالکوٹ میں بڑی کارروائی کرتے ہوئے انٹرنیشنل چائلڈ پورنو گرافی گروہ کے ساتھ کام کرنیوالے اہم ملزم ارسلان کو گرفتار کرلیا۔

فیڈرل انویسٹی گیشن ایجنسی ( ایف آئی اے) کے مطابق ملزم ارسلان امریکا سے چلائے جانے والے بین الاقوامی چائلڈ پورنو گرافی گروہ کے ساتھ رابطے میں تھا، ملزم سے متعلق انٹرپول نے ملزم سے متعلق معلومات پاکستان کو دی تھیں۔

ایف آئی اے کے مطابق عالمی گروہ کم عمر بچوں کی فحش ویڈیوز فروخت کرتا ہے، ملزم سے فحش ویڈیوز اور تصاویر کا 225 جی بی ڈیٹا ملا ہے۔

ایف آئی اے کا کہنا ہے کہ انٹرپول سے ملی معلومات کی روشنی میں ملزم سے مزید تحقیقات جاری ہیں۔

واضح رہے کہ اس سے قبل گزشتہ سال بچوں کو بدفعلی کا نشانہ بنا کر پورنو گرافی کے ذریعے پیسے کمانے والی’’ انٹرنیشنل ڈارک ویب‘‘ کے سرغنہ سہیل ایاز عرف علی کو گرفتار کیا گیا تھا، ملزم خیبرپختونخوا حکومت کے محکمہ پلاننگ اینڈڈویلپمنٹ سے بطور کنسلٹنٹ منسلک تھا۔