اوکاڑہ: خاتون کے ساتھ زیادتی کرنیوالے ایس ایچ او کے خلاف مقدمہ درج

اوکاڑہ (ڈیلی اردو) صوبہ پنجاب کے ضلع اوکاڑہ میں شادی کا جھانسہ دے کر سات سال تک خاتون کے ساتھ مبینہ طور پر زیادتی کرنے والے ایس ایچ او تھانہ حجرہ شاہ مقیم انجم ضیاء کے خلاف مقدمہ درج کرلیا گیا۔ ایس ایچ او معطل، جاوید خان کو ایس ایچ او تھانہ حجرہ شاہ مقیم تعینات کر دیا گیا۔ متاثرہ خاتون صباح کے بیان کے منظر عام پر آنے کے بعد ڈی پی او اوکاڑہ عمر سعید ملک نے ایس ایچ او انجم ضیاء کے خلاف انکوائری کے فوری طور پر احکامات جاری کیے۔ انکوائری کمیٹی کی سربراہی ایس پی انویسٹی گیشن شمس الحق دورانی نے کی جب کہ کمیٹی میں ڈی ایس پی صدر اوکاڑہ سلیم اور ڈی ایس پی ٹریفک سید ریاض شامل تھی۔انکوائری میں ایس ایچ او انجم ضیاء گنہگار ثابت ہوگئے جس کے بعد ڈی پی او اوکاڑہ کے احکامات کی روشنی میں ایس ایچ او حجرہ شاہ مقیم انجم ضیاء کے خلاف خاتون سے زیادتی کی دفعہ 376 کا مقدمہ درج کرلیا۔ وقوع کی تحقیقات شروع کر دی گئی ہے ڈی پی او اوکاڑہ عمر سعید ملک کا کہنا ہے کہ اس سلسلہ میں انصاف کے تقاضے پورے کیے جائیں گے متاثرہ لڑکی صباء کا کہنا ہے کہ پولیس آفیسر انجم ضیاء ایک عرصہ سے اس کے ساتھ شادی کرنے کا جھانسہ دے رہا تھا، گزشتہ رات تھانہ کی رہائش گاہ پر ایس ایچ او نے مبینہ طور پر نہ صرف اسے بری طرح تشدد کا نشانہ بنایا بلکہ شراب پیتا اور اسے بلاتا رہا اس دوران اسے جنسی تشدد کا نشانہ بھی بنایا گیا وہ با مشکل ایس ایچ او کے چنگل سے فرار ہونے میں کامیاب ہوئی۔ پولیس اس واقعے کی مزید سیاسی بنیادوں پر تحقیقات کر رہی ہے۔