شام: اسد حکومت کے خاتمے کے بعد بدامنی کا سلسلہ جاری ،اب تک 10 ہزار 409 شہری ہلاک

دمشق(ڈیلی اردو) شام میں بشار الاسد حکومت کے خاتمے کے بعد بھی شہریوں کے خلاف تشدد اور بدامنی کا سلسلہ جاری ہے۔ شامی آبزرویٹری برائے انسانی حقوق کے مطابق 8 دسمبر 2024 سے 17 اگست 2026 تک مختلف واقعات میں کم از کم 10 ہزار 409 شہری ہلاک ہوچکے ہیں۔

رپورٹ کے مطابق 8 دسمبر سے 2024 کے اختتام تک 1894 شہری ہلاک ہوئے، جبکہ 2025 کے دوران ہلاکتوں کی تعداد 7087 رہی۔ رواں سال یکم جنوری سے 17 اگست تک مزید 1428 شہری جان سے گئے۔

آبزرویٹری کے مطابق 2026 کے دوران جنوری میں 189، فروری میں 211، مارچ میں 188، اپریل میں 167، مئی میں 230، جون میں 159 اور جولائی میں 202 شہری ہلاک ہوئے، جبکہ یکم سے 17 اگست تک مزید 82 شہریوں کی ہلاکت ریکارڈ کی گئی۔

ادارے کا کہنا ہے کہ شہریوں کو مسلح جھڑپوں، جرائم، بدامنی اور مختلف نوعیت کی خلاف ورزیوں کے علاوہ جنگ کے دوران بچ جانے والی بارودی سرنگوں اور غیر پھٹے ہوئے دھماکا خیز مواد سے بھی خطرات لاحق ہیں۔

شامی آبزرویٹری نے متعلقہ حکام اور مختلف علاقوں میں بااثر فریقوں پر زور دیا ہے کہ وہ شہریوں کے تحفظ کو یقینی بنانے کے لیے مؤثر اقدامات کریں، بدامنی پر قابو پائیں اور قتل و دیگر خلاف ورزیوں میں ملوث افراد کے خلاف آزادانہ قانونی کارروائی کی جائے۔

آبزرویٹری نے شہریوں کے خلاف پیش آنے والے واقعات کی شفاف اور غیر جانب دارانہ تحقیقات کا مطالبہ کرتے ہوئے کہا ہے کہ ذمہ داروں کا تعین کرکے انہیں قانون کے مطابق سزا دی جانی چاہیے تاکہ احتساب کا عمل مضبوط ہو اور ایسے واقعات کی تکرار روکی جاسکے۔

ادارے کے مطابق شام میں حقیقی استحکام صرف اقتدار یا علاقوں کی تبدیلی سے حاصل نہیں ہوگا بلکہ اس کے لیے قانون کی حکمرانی، شہریوں کے جان و مال کا تحفظ اور انسانی حقوق کی خلاف ورزیوں میں ملوث عناصر کا احتساب ضروری ہے۔