شام: حلب میں کرد اکثریتی علاقوں پر حکومتی بمباری، درجنوں ہلاک و ہزاروں بے گھر

دمشق (ڈیلی اردو/سانا) شامی فوج نے جمعرات 8 جنوری کو شہریوں کو علاقہ چھوڑنے کی وارننگ دینے کے بعد حلب شہر کے کرد اکثریتی محلوں پر شدید بمباری شروع کر دی۔ لڑائی کا یہ تیسرا روز ہے اور اسلام پسند حکام کے برسرِ اقتدار آنے کے بعد حلب میں تشدد کی یہ اب تک کی بدترین لہر قرار دی جا رہی ہے۔

یہ کشیدگی ایک ایسے وقت میں سامنے آئی ہے جب شمال مشرقی شام میں کرد انتظامیہ کو نئی شامی حکومت میں ضم کرنے کے معاہدے پر عمل درآمد تعطل کا شکار ہے، جس سے سیاسی اور عسکری تناؤ میں اضافہ ہو رہا ہے۔

حالیہ جھڑپوں نے علاقائی سطح پر بھی تشویش پیدا کر دی ہے۔ ایک جانب ترکی نے شامی حکام کی حمایت کا عندیہ دیا ہے، جبکہ دوسری طرف اسرائیل نے کرد علاقوں پر ہونے والے حملوں کی مذمت کی ہے۔

منگل کے روز شامی فوج اور کردوں کی قیادت میں لڑنے والی فورسز کے درمیان حلب کے شیخ مقصود اور اشرفیہ محلوں میں جھڑپوں کا آغاز ہوا تھا۔ ان جھڑپوں کے نتیجے میں اب تک کم از کم 17 افراد ہلاک جبکہ ہزاروں شہری بے گھر ہو چکے ہیں۔

شام کی سرکاری خبر رساں ایجنسی سانا نے ایک فوجی ذریعے کے حوالے سے بتایا ہے کہ جمعرات کو ان دونوں علاقوں میں ایس ڈی ایف کے ٹھکانوں کو نشانہ بناتے ہوئے شدید بمباری کی گئی۔

حلب ایئرپورٹ پر پروازیں بدستور معطل ہیں، جبکہ اے ایف پی کے نامہ نگاروں کے مطابق شہر بھر میں دکانیں، یونیورسٹیاں اور اسکول مسلسل دوسرے روز بھی بند رہے۔ کرد اکثریتی علاقوں سے شہری محفوظ راہداریوں کے ذریعے نکل رہے ہیں، جبکہ شامی فوجی اہلکار مختلف مقامات پر مردوں کی تلاشی لے رہے ہیں۔