شام: فوجی مرکزی پر مسلح افراد کا حملہ ، 2 افراد ہلاک، متعدد زخمی

دمشق(ڈیلی اردو) شمال مشرقی شام کے شہر القامشلی کے نواحی علاقے میں ایک فوجی مرکز پر مسلح افراد کے حملے کے نتیجے میں دو افراد ہلاک اور متعدد زخمی ہوگئے۔

شامی سکیورٹی ذرائع کے مطابق مسلح حملہ آور موٹر سائیکلوں پر سوار تھے۔ انہوں نے الحسکہ کے علاقے میں واقع طویل حرب گاؤں کے قریب القامشلی بریگیڈ کے ایک فوجی مرکز کو آر پی جی نما دستی ہتھیاروں سے نشانہ بنایا۔

ذرائع کا کہنا ہے کہ حملہ آور القامشلی کے جنوبی دیہی علاقوں کی جانب سے آئے تھے، جہاں عرب قبائلی جنگجوؤں کی سرگرمیوں کی اطلاعات سامنے آتی رہی ہیں۔ حملے میں ہلاک اور زخمی ہونے والے افراد میں ایسے اہلکار بھی شامل ہیں جو حال ہی میں شامی وزارت دفاع میں شامل ہوئے تھے اور اس سے قبل کرد قیادت والی سیریئن ڈیموکریٹک فورسز (قسد) کا حصہ رہے تھے۔

حملے کے بعد شامی سکیورٹی اور فوجی دستوں نے علاقے میں سرچ آپریشن شروع کردیا اور حملہ آوروں کی تلاش کے لیے مختلف مقامات پر کارروائی کی جا رہی ہے۔

واقعے سے قبل الحسکہ اور القامشلی کے دیہی علاقوں میں بعض عرب قبائلی گروہوں نے قسد اور شامی حکومت کے درمیان جنگجوؤں کے انضمام کے طریقہ کار پر اعتراضات کا اظہار کرتے ہوئے کشیدگی بڑھانے کی دھمکی دی تھی۔ بعد ازاں حکومتی حکام کی مداخلت سے صورتحال کو قابو میں لانے کی کوشش کی گئی۔

رواں سال 29 جنوری کو شامی حکومت اور قسد کے درمیان جنگ بندی اور مرحلہ وار انضمام سے متعلق ایک معاہدہ بھی طے پایا تھا۔ معاہدے کے تحت دونوں جانب کی فورسز کو رابطہ لائنوں سے پیچھے ہٹانے، الحسکہ اور القامشلی میں سکیورٹی انتظامات بہتر بنانے اور قسد کے بعض عسکری و انتظامی ڈھانچوں کو شامی ریاستی اداروں میں شامل کرنے پر اتفاق کیا گیا تھا۔

معاہدے میں مقامی کرد آبادی کے شہری و تعلیمی حقوق کے تحفظ اور بے گھر افراد کی اپنے علاقوں میں واپسی سے متعلق امور بھی شامل تھے۔