صومالی فوج کا الشباب کے خلاف آپریشن، گروپ لیڈر سمیت 14 دہشت گرد ہلاک

موغادیشو (ڈیلی اردو) صومالیہ کے وسطی ضلع مہاس کے نزدیک کارروائیوں میں الشباب کے گروپ لیڈر سمیت 14 دہشت گردوں کو ہلاک کر دیا گیا ہے۔

ان کارروائیوں کی قیادت کرنے والے صومالی نیشنل آرمی (ایس این اے) کی زمینی افواج کے کمانڈر محمد تہلیل بیہی نے صومالی نیوز ایجنسی کو بتایا کہ مہاس کے علاقہ میں شدت پسند تنظیم کا گروپ لیڈر بھی ہلاک ہونیوالوں میں شامل ہے۔

بیہی نے کہا کہ فوجی دستوں نے مہاس کے 4 دیہات میں کارروائیوں کے دوران ہتھیار اور گولہ بارود بھی برآمد کیا ہے۔

صومالیہ میں سرکاری فورسز جنوبی علاقوں میں الشباب کیخلاف جنگ میں مصروف ہیں جہاں دیہی علاقوں میں عسکریت پسندوں کے ٹھکانے اب تک موجود ہیں جو بارودی سرنگیں نصب کر کے اور گھات لگا کر حملے کرتے رہتے ہیں۔