غزہ: اسرائیل کا حماس کے سکیورٹی ادارے کے اعلیٰ عہدیدار کو ہلاک کرنے کا دعویٰ

غزہ(ڈیلی اردو) غزہ میں اسرائیلی فوج نے حماس کے محکمۂ سکیورٹی کے ایک اعلیٰ عہدیدار اکرم بسام شعبان یاسین کو ہلاک کرنے کا دعویٰ کیا ہے۔ اسرائیلی فوج نے منگل کی شام جاری بیان میں کہا کہ یاسین حماس کے زیر انتظام محکمۂ سکیورٹی میں اہم ذمہ داریاں انجام دے رہے تھے۔

اسرائیلی فوج کے مطابق حماس کا یہ ادارہ تنظیم کے اعلیٰ عہدیداروں کی حفاظت، ان کی نقل و حرکت کو محفوظ بنانے اور اسرائیل کے خلاف حملوں کی منصوبہ بندی میں معاونت کے لیے انٹیلی جنس معلومات جمع کرنے کا کام کرتا ہے۔ اسرائیلی بیان میں الزام عائد کیا گیا کہ یاسین حالیہ عرصے میں اسرائیلی فوج کے خلاف حملوں کی تیاری اور حماس کی صلاحیتیں بحال کرنے کی کوششوں میں مصروف تھے۔ اسرائیل نے ان سرگرمیوں کو جنگ بندی کی خلاف ورزی قرار دیا، تاہم ان الزامات کی آزادانہ تصدیق سامنے نہیں آئی۔

دوسری جانب غزہ میں مقامی محکمۂ شہری دفاع اور ہسپتالوں کے مطابق، اسی روز اسرائیلی حملوں میں کم از کم سات فلسطینی ہلاک ہوئے۔ غزہ کی وزارتِ صحت کے اعدادوشمار کے مطابق 7 اکتوبر 2023 سے جاری جنگ میں فلسطینیوں کی ہلاکتوں کی تعداد 74 ہزار 400 سے تجاوز کر چکی ہے، جبکہ شہری بنیادی ڈھانچے کو بھی بڑے پیمانے پر نقصان پہنچا ہے۔