غزہ کی تعمیر نو کیلئے ’ماسٹر پلان‘ پیش کر دیا گیا

واشنگٹن (ڈیلی اردو) امریکی صدر ڈونلڈ ٹرمپ کے داماد جیریڈ کُشنر، جو اہم امور میں اعلیٰ کردار ادا کر چکے ہیں، نے غزہ پٹی کو ایک شاندار ساحلی ریزورٹ میں تبدیل کرنے کا ایک ترقیاتی منصوبہ پیش کیا ہے۔ چمکتی ہوئی بلند عمارتوں اور اپارٹمنٹس کی تصاویر والی سلائیڈز کا استعمال کرتے ہوئے جیریڈ کشنر نے غزہ کی تعمیر نو کے لیے ٹرمپ کا حمایت یافتہ ’’ماسٹر پلان‘‘ پیش کیا۔  

کشنر نے جمعرات کو ورلڈ اکنامک فورم کے ایک اجلاس میں تقریر کرتے ہوئے کہا کہ جنگ کے بعد غزہ ایک ایسی جگہ بن جائے گا، جہاں لوگ ’’ترقی اور بہترین روزگار حاصل کر سکیں گے۔‘‘  

انہوں نے کہا، ’’مشرق وسطیٰ میں ایسے شہر دو یا تین ملین لوگوں کے لیے تین سال میں تعمیر کیے جاتے ہیں۔‘‘ کشنر کے پاس کوئی سرکاری عہدہ نہیں ہے البتہ وہ امریکہ کی حمایت یافتہ غزہ امن مذاکرات کا حصہ رہے ہیں۔  

انہوں نے مزید کہا، ’’لہٰذا ایسی چیزیں بہت ممکن ہیں اگر ہم اسے عملی جامہ پہنائیں۔‘‘ یہ بیان انہوں نے ٹرمپ کی جانب سے پیش کیے گئے ’’بورڈ آف پیس‘‘ کے فوری بعد دیا، جو غزہ میں جنگ بندی کی نگرانی اور پٹی کی تعمیر نو کے لیے قائم کیا گیا ہے۔  

کشنر نے غزہ کے تباہ شدہ بنیادی ڈھانچے اور عوامی خدمات کی بحالی کے لیے کم از کم 25 ارب ڈالر کی سرمایہ کاری کی ضرورت پر زور دیا۔  انہوں نے کہا، ’’یہ امید کا باعث بن سکتا ہے۔ یہ ایک منزل بن سکتا ہے۔‘‘