فرانس میں تعینات لبنانی سفیر پر خواتین سے زیادتی کا الزام، تحقیقات کیلئے تفتیشی ٹیم پیرس پہنچ گئی

پیرس (مانیٹرنگ ڈیسک) لبنان کی وزارت خارجہ نے کہا ہے کہ وہ فرانس میں تعینات اپنے سفیر رامی عدوان کے خلاف زیادتی اور تشدد کے الزامات کی تحقیقات کیلئے تفتیشی ٹیم پیرس بھیجے گی۔

پیرس میں قائم لبنان کے سفارتخانے کی دو سابق ملازمین نے رامی عدوان کے خلاف شکایات کی تھیں جس پر فرانس نے تفتیش شروع کی۔

فرانسیسی حکومت نے لبنانی حکام سے مطالبہ کیا ہے کہ رامی عدوان کی سفارتی استثنیٰ ختم کی جائے تاکہ ان کا ٹرائل ہوسکے۔

لبنان کی وزارت خارجہ نے فوری طور پر وزارت کے سیکریٹری جنرل کی سربراہی میں ایک تفتیشی کمیٹی کو پیرس روانہ کرنے کا فیصلہ کیا ہے تاکہ متعلقہ سفیر سے باز پرس کی جاسکے اور شکایت کنندگان کے بیانات بھی لیے جائیں۔

لبنانی سفارتخانے میں تعینات 31 سالہ سابق افسر نے جون 2022ء میں شکایت درج کروائی تھی کہ سفیر نے اپنی نجی رہائشگاہ پر مئی 2020ء کے دوران اس کے ساتھ زیادتی کی۔

شکایت کنندہ کا کہنا تھا کہ اس کا سفیر کے ساتھ تعلق تھا اور وہ اس پر روزانہ ذہنی و جسمانی تشدد کرتا تھا۔

دوسری متاثرہ خاتون کی عمر 28 برس ہے، انہوں نے پچھلے سال فروری میں شکایت کرتے ہوئے کہا تھا کہ سفیر نے جنسی تعلقات استوار نہ کرنے پر اسے سلسلہ وار زد و کوب کیا۔

سفیر رامی عدوان کے وکیل کا کہنا ہے کہ ان کا موکل دونوں خواتین کے ساتھ 2018ء سے 2022ء کے دوران رومانوی تعلق میں تھا جس میں لڑائی جھگڑا ہوتا تھا۔