قلات میں سیکورٹی فورسز کا آپریشن، کالعدم تنظیم بی ایل اے کے چار دہشتگرد ہلاک

کوئٹہ (ڈیلی اردو) پاکستان کے شورش زدہ صوبے بلوچستان کے ضلع قلات میں سیکیورٹی فورسز کے ایک آپریشن کے دوران کالعدم بلوچ لبریشن آرمی (بی ایل اے) سے تعلق رکھنے والے چار دہشتگرد ہلاک ہو گئے ہیں۔

پاکستانی فوج کے شعبہ تعلقات عامہ (آئی ایس پی آر) کے مطابق یہ انٹیلیجنس بیسڈ آپریشن یکم نومبر کو شدت پسندوں کی موجودگی کی اطلاع پر کیا گیا۔ کارروائی کے دوران سیکیورٹی فورسز اور دہشتگردوں کے درمیان فائرنگ کا تبادلہ ہوا، جس میں چار دہشتگرد مارے گئے۔

آئی ایس پی آر کے مطابق ہلاک ہونے والے دہشتگرد مختلف تخریبی اور دہشت گرد کارروائیوں میں ملوث تھے۔ فورسز نے دہشتگردوں کے ٹھکانوں سے بھاری مقدار میں اسلحہ اور گولہ بارود بھی برآمد کیا۔

بیان میں مزید کہا گیا ہے کہ علاقے میں کلیئرنس اور سینیٹائزیشن آپریشن جاری ہے، جبکہ ’عزمِ استحکام‘ کے تحت ملک بھر میں انسدادِ دہشت گردی کی کارروائیاں بھرپور انداز میں جاری رہیں گی۔

آئی ایس پی آر نے اس عزم کا اعادہ کیا کہ “پاکستان سے غیر ملکی سرپرستی میں کی جانے والی دہشت گردی کا مکمل خاتمہ قومی عزم ہے۔”