قندھار: طالبان سپریم لیڈر امیر ہبت اللہ اخونزدہ پہلی بار منظر عام پر آگئے

قندھار (ڈیلی اردو) طالبان کے سپریم لیڈر ہیبت اللہ اخوند زادہ پہلی مرتبہ عوام کے سامنے آئے ہیں۔

طالبان حکام کے مطابق انہوں نے اتوار کو افغانستان کے جنوبی شہر قندھار میں اپنے حامیوں سے خطاب کیا۔

خبر رساں ادارے ‘اے ایف پی’ کے مطابق طالبان حکام نے ملا ہیبت اللہ کے منظر عام پر آنے کا اعلان کرتے ہوئے کہا کہ ہفتے کو ہیبت اللہ اخوندزادہ نے دارالعلوم حکیمہ مدرسے کا دورہ کیا اور اپنے ”بہادر سپاہیوں اور شاگردوں” سے خطاب کیا۔

ملا ہیبت اللہ کے دورے کے موقع پر سیکیورٹی کے سخت انتظامات کیے گئے تھے اور تقریب کی کوئی تصاویر یا ویڈیو سامنے نہیں آئی ہے۔ البتہ طالبان نے اپنے سوشل میڈیا اکاؤنٹس پر ان کی دس منٹ کی آڈیو ریکارڈنگ شیئر کی ہے۔

اخوندزادہ سال 2016 سے طالبان کے سربراہ ہیں لیکن وہ عوامی منظرنامے سے غائب رہے ہیں۔ یہاں تک کہ اگست میں طالبان کے افغانستان کے اقتدار سنبھالنے کے بعد بھی وہ منظر عام پر نہیں آئے تھے اس یکسر عدم موجودگی کے بارے میں کئی افواہیں گردش کرنے لگی تھی۔

طالبان کے سربراہ ملا ہیبت اللہ اخوندزادہ ایسے موقع پر سامنے آئے ہیں جب طالبان کے اقتدار میں آنے کے بعد سے ملک مختلف بحرانوں کا شکار ہے۔