قومی سلامتی پر کوئی سمجھوتہ نہیں ہوگا، فیلڈ مارشل عاصم منیر

راولپنڈی (ڈیلی اردو) چیف آف ڈیفنس فورسز اور آرمی چیف فیلڈ مارشل سید عاصم منیر کی زیرِ صدارت جنرل ہیڈ کوارٹرز (جی ایچ کیو) راولپنڈی میں 273ویں کور کمانڈرز کانفرنس منعقد ہوئی۔

جمعرات کے روز فوج کے شعبہ تعلقاتِ عامہ (آئی ایس پی آر) کی جانب سے جاری بیان کے مطابق کانفرنس کے دوران آرمی چیف نے کہا کہ فوج اور حکومت کی مشترکہ کوششوں اور پاکستانی عوام کی بھرپور حمایت سے ملک یقینی طور پر استحکام اور عزت و وقار کی جانب بڑھ رہا ہے۔

کانفرنس میں اندرونی اور بیرونی سلامتی کی مجموعی صورتحال کا تفصیلی جائزہ لیا گیا جبکہ ابھرتے ہوئے خطرات، علاقائی سلامتی کے چیلنجز اور آپریشنل تیاریوں پر خصوصی توجہ دی گئی۔

آئی ایس پی آر کے مطابق فورم نے دہشت گردی، جرائم اور ذاتی سیاسی مفادات کے درمیان کسی بھی قسم کے گٹھ جوڑ کو واضح طور پر مسترد کرتے ہوئے اس عزم کا اظہار کیا کہ ایسے عناصر کو قومی یکجہتی، سلامتی اور استحکام کو نقصان پہنچانے کی اجازت نہیں دی جائے گی۔ فورم نے اس بات کا بھی اعادہ کیا کہ مسلح افواج اور پاکستانی عوام کے درمیان تفرقہ پیدا کرنے کی کسی کوشش کو ہر صورت ناکام بنایا جائے گا۔

بیان میں کہا گیا ہے کہ کانفرنس کے شرکا نے اس بات پر اتفاق کیا کہ انڈین سرپرستی میں کام کرنے والے تمام دہشت گردوں، ان کے سہولت کاروں اور معاونین کے ساتھ بلا تفریق اور بلا رعایت کارروائی جاری رکھی جائے گی۔

کور کمانڈرز کانفرنس کے دوران مسئلہ فلسطین پر پاکستان کے اصولی اور دیرینہ مؤقف کی توثیق کی گئی۔ فورم نے غزہ میں فوری اور مستقل جنگ بندی، بلا رکاوٹ انسانی امداد کی ترسیل اور ایک خودمختار فلسطینی ریاست کے قیام کے لیے قابلِ اعتماد اور عملی راستہ اختیار کرنے کا مطالبہ کیا۔