لاس اینجلس: پولیس ٹریننگ سینٹر میں دھماکا، تین اہلکار ہلاک، ایک زخمی

لاس اینجلس (ڈیلی اردو) امریکی ریاست کیلیفورنیا کے شہر لاس اینجلس میں واقع شیرف ڈپارٹمنٹ کے تربیتی مرکز "بِسکیلوز ٹریننگ سینٹر" میں زوردار دھماکے کے نتیجے میں تین سیکیورٹی اہلکار ہلاک اور ایک شدید زخمی ہو گیا۔ امریکی میڈیا کے مطابق یہ دھماکا جمعہ کی صبح اُس وقت پیش آیا جب اسپیشل انفورسمنٹ بیورو کے اہلکار تربیتی مشق کے دوران مبینہ طور پر غیر فعال دھماکہ خیز مواد کو ہینڈل کر رہے تھے۔

دھماکے کے فوراً بعد جائے وقوعہ کو گھیرے میں لے کر سرچ آپریشن شروع کر دیا گیا، جبکہ بم اسکواڈ، ایف بی آئی اور اے ٹی ایف کی ٹیمیں تحقیقات کے لیے موقع پر پہنچ گئیں۔ ابتدائی طور پر حکام نے واقعے کو تربیتی حادثہ قرار دیا ہے، تاہم شواہد اکٹھے کیے جا رہے ہیں تاکہ دھماکے کی اصل وجوہات کا تعین کیا جا سکے۔

لاس اینجلس کاؤنٹی کے شیرف رابرٹ لونا اور گورنر گیون نیوزوم نے واقعے پر افسوس کا اظہار کرتے ہوئے جاں بحق اہلکاروں کو خراج عقیدت پیش کیا ہے۔ زخمی اہلکار کو قریبی اسپتال منتقل کر دیا گیا ہے جہاں اس کی حالت تشویشناک بتائی جا رہی ہے۔ حکام کا کہنا ہے کہ واقعے کی مکمل اور شفاف تحقیقات کی جائیں گی۔