لبنان جھڑپ میں اسرائیلی فوجی ہلاک، مجموعی تعداد 18 ہو گئی

یروشلم (ڈیلی اردو) اسرائیلی فوج نے اعلان کیا ہے کہ لبنان کی سرحد کے قریب جھڑپ کے دوران اس کا ایک اور فوجی ہلاک ہو گیا ہے، جس کے بعد لبنان محاذ پر ہلاک ہونے والے اسرائیلی فوجیوں کی تعداد 18 تک پہنچ گئی ہے۔

اسرائیلی فوج کے مطابق 47 سالہ سارجنٹ فرسٹ کلاس الیگزینڈر گلووانیف اتوار کے روز جنوبی لبنان کے قریب ایک جھڑپ میں ہلاک ہوئے۔ 

فوج کی جانب سے جاری بیان میں کہا گیا ہے کہ جھڑپ کے دوران اسرائیلی اہلکاروں کو شدید مزاحمت کا سامنا کرنا پڑا۔

مشرقِ وسطیٰ میں جاری کشیدگی کے دوران حزب اللہ نے دعویٰ کیا ہے کہ اس نے جنوبی لبنان کے قریب اسرائیلی فوجی اہداف پر ڈرون حملہ کیا ہے اور اس کی ویڈیو بھی جاری کر دی ہے۔

حزب اللہ کے مطابق یہ حملہ اسرائیلی فوج کی ان پوزیشنز کو نشانہ بنانے کے لیے کیا گیا جو سرحدی علاقے میں کارروائیوں میں مصروف تھیں۔ تنظیم کی جانب سے جاری ویڈیو میں مبینہ طور پر ایک ڈرون کو ہدف کی جانب بڑھتے اور پھر دھماکے کے مناظر دکھائے گئے ہیں۔

مشرقِ وسطیٰ میں جاری یہ تنازع 28 فروری کو اس وقت شدت اختیار کر گیا تھا جب امریکہ اور اسرائیل نے ایران پر مشترکہ حملے کیے۔ بعد ازاں ایران کے سپریم لیڈر علی خامنہ ای   کی ہلاکت کے بعد حزب نے اسرائیل پر راکٹ حملے شروع کر دیے تھے، جس کے نتیجے میں جنگ لبنان تک پھیل گئی۔

اس کے جواب میں اسرائیل نے لبنان میں بڑے پیمانے پر فضائی حملوں کا آغاز کیا جبکہ جنوبی لبنان میں زمینی کارروائیاں بھی شروع کر دی گئیں۔ سرحدی علاقوں میں مسلسل جھڑپوں اور راکٹ حملوں کے باعث خطے میں کشیدگی بدستور برقرار ہے۔