لوئر دیر سے افغان دہشت گرد کمانڈر زخمی حالت میں گرفتار

لوئر دیر (نمائندہ ڈیلی اردو) صوبہ خیبر پختونخوا کے ضلع لوئر دیر میں افغان کمانڈر کو زخمی حالت میں پولیس نے گرفتار کر لیا۔

تفصیلات کے مطابق لوئر دیر کے علاقے میدان میں سرچ آپریشن کے دوران پولیس نے بڑی کارروائی کرتے ہوئے افغان دہشت گرد کمانڈر کو گرفتار کرلیا۔

اس حوالے سے بتایا گیا ہے کہ دہشت گرد آپریشن کے دوران سیکورٹی فورسز سے مقابلے میں زخمی ہو گیا تھا۔ پولیس کا کہنا ہے کہ دہشت گرد خالی زیر تعمیر گھر میں پناہ لیے ہوئے تھا۔

پولیس ذرائع کے مطابق گرفتار افغان دہشت گرد عبدالرحمٰن بدخشاں ضلع اسمار افغانستان کا رہائشی ہے، جسے تفتیش کے لیے نامعلوم مقام پر منتقل کردیا گیا ہے۔

واضح رہے کہ مذکورہ دہشت گرد پہاڑی گاؤں کی ایک خالی کھنڈر نما گھر میں چھپا ہوا تھا۔