لکی مروت: اغوا شدہ جیل پولیس اہلکار ہلاک، نعش برآمد

لکی مروت (ڈیلی اردو رپورٹ) پاکستان کے شورش زدہ صوبہ خیبرپختونخوا کے لکی  ضلع مروت میں نامعلوم مسلح افراد کے ہاتھوں اغوا کیے گئے جیل پولیس اہلکار کو ہلاک کر دیا گیا۔للکی مروت میں نامعلوم مسلح افراد کے ہاتھوں اغوا کیے گئے جیل پولیس اہلکار کو ہلاک کر دیا گیا۔

پولیس ذرائع کے مطابق مغوی اہلکار صدیق اللہ کو صبح کے وقت احمد خیل کے قریب سے اغوا کیا گیا تھا، جس کے بعد بعد ازاں اس کی نعش برآمد ہوئی۔ واقعے کے بعد علاقے میں شدید تشویش کی لہر دوڑ گئی ہے۔

پولیس کے مطابق صدیق اللہ ضلع کرک کی جیل میں تعینات تھا اور چھٹی پر اپنے گھر آیا ہوا تھا۔ اہلکار کا تعلق گاؤں عبدالخیل سے بتایا جاتا ہے۔

ذرائع کا کہنا ہے کہ مسلح افراد اہلکار کو اغوا کر کے فرار ہو گئے تھے، جبکہ واقعے کے بعد پولیس نے علاقے کو گھیرے میں لے کر سرچ آپریشن شروع کر دیا تھا۔

یاد رہے کہ گزشتہ روز بھی دہشت گردوں نے اسی علاقے میں اینٹی نارکوٹکس فورس کے اہلکار فرید اللہ کو اغوا کے بعد ہلاک کر دیا تھا، جن کا تعلق بھی عبدالخیل سے تھا۔ مقتول اہلکار کی مبینہ ویڈیو بھی سوشل میڈیا پر وائرل ہوئی تھی۔

اہل علاقہ کے مطابق گزشتہ روز مسلح افراد نے مغوی اہلکار کی حوالگی کے لیے ڈھوڈا گاؤں طلب کیا تھا، جہاں بعد ازاں اسے فائرنگ کر کے ہلاک کر دیا گیا۔ واقعے کے بعد علاقے میں شدید غم و غصہ پایا جاتا ہے۔

ادھر آج کے واقعے کے بعد مقامی لوگ بڑی تعداد میں مسلح ہو کر سڑکوں پر نکل آئے اور مبینہ حملہ آوروں کی تلاش شروع کر دی ہے۔

ذرائع کے مطابق گزشتہ ہفتے بھی اسی علاقے میں گاؤں بیگوخیل کے دو نوجوانوں صفی اللہ اور افنان کو بے دردی سے ہلاک کر دیا گیا تھا، جس کے بعد صورتحال مزید کشیدہ ہو گئی ہے۔