لکی مروت اور بنوں میں شدت پسندوں کی فائرنگ، 4 پولیس اہلکار ہلاک

لکی مروت/بنوں (نمائندگان ڈیلی اردو) پاکستان کے شورش زدہ صوبے خیبر پختونخوا کے اضلاع لکی مروت اور بنوں میں فائرنگ کے دو الگ الگ واقعات میں چار پولیس اہلکار ہلاک ہو گئے۔

لکی مروت پولیس کے ترجمان کے مطابق سرائے نورنگ شہر میں نامعلوم موٹرسائیکل سوار شدت پسندوں نے فائرنگ کی، جس کے نتیجے میں ڈیوٹی پر مامور تین ٹریفک پولیس اہلکار ہلاک ہو گئے۔

ترجمان نے بتایا کہ فائرنگ کے واقعے میں انچارج ٹریفک پولیس نورنگ جلال خان، کانسٹیبل عزیز اللہ اور کانسٹیبل عبداللہ ہلاک ہوئے۔

پولیس کے مطابق نامعلوم موٹرسائیکل سوار شدت پسند فائرنگ کے بعد فرار ہو گئے، جبکہ ہلاک ہونے والے پولیس اہلکاروں کی لاشیں تحصیل ہیڈ کوارٹر اسپتال سرائے نورنگ منتقل کر دی گئی ہیں۔

دوسری جانب بنوں پولیس کا کہنا ہے کہ تھانہ منڈان کی حدود میں نامعلوم افراد کی فائرنگ سے ایک پولیس اہلکار ہلاک ہو گیا۔ 

پولیس کے مطابق کانسٹیبل رشید خان گھر سے ڈیوٹی کے لیے تھانا منڈان جا رہے تھے کہ کفشی خیل منڈان کے علاقے میں مسلح شدت پسندوں نے ان پر فائرنگ کر دی، جس کے نتیجے میں وہ موقع پر ہی ہلاک ہو گئے۔

وزیراعلیٰ خیبر پختونخوا کی مذمت

وزیراعلیٰ خیبر پختونخوا سہیل آفریدی نے لکی مروت میں فائرنگ کے واقعے کی مذمت کرتے ہوئے ہلاک ہونے والے ٹریفک پولیس اہلکاروں کے لواحقین سے اظہار تعزیت کیا ہے۔

وزیراعلیٰ نے کہا کہ واقعہ افسوسناک ہے اور پولیس اہلکاروں کی قربانیاں رائیگاں نہیں جائیں گی۔ ان کا کہنا تھا کہ بزدلانہ حملوں سے ملک دشمن شدت پسند اپنے مذموم عزائم میں کامیاب نہیں ہو سکتے۔

سہیل آفریدی نے کہا کہ دہشت گردی کے خلاف جنگ میں پولیس اہلکار فرنٹ لائن پر خدمات انجام دے رہے ہیں، ملوث شدت پسند عناصر کو قانون کے کٹہرے میں لا کر کیفرِ کردار تک پہنچایا جائے گا۔

انہوں نے مزید کہا کہ صوبائی حکومت پولیس فورس کے شانہ بشانہ کھڑی ہے اور ہلاک ہونے والے اہلکاروں کے لواحقین کو ہر ممکن معاونت فراہم کی جائے گی۔