لکی مروت میں دہشت گردوں کا کواڈ کاپٹر حملہ، پولیس اہلکار سمیت 2 افراد ہلاک، 19 زخمی

لکی مروت (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع لکی مروت کے علاقے تختی خیل میں دہشت گردوں نے کواڈ کاپٹر (ڈرون) کے ذریعے حملہ کیا، جس کے نتیجے میں ایک پولیس اہلکار عمر خان سمیت 2 افراد ہلاک جبکہ خواتین اور بچوں سمیت 19 افراد زخمی ہو گئے۔

پولیس کے مطابق دہشت گردوں کے حملے کے بعد پولیس اور مقامی امن لشکر نے فوری جوابی کارروائی کی۔ پولیس کی جوابی فائرنگ اور مشترکہ آپریشن کے دوران 6 دہشت گرد ہلاک ہو گئے۔

ڈسٹرکٹ ہیڈ کوارٹر اسپتال لکی مروت کے میڈیکل سپرنٹنڈنٹ ڈاکٹر اسحاق خان کے مطابق زخمیوں میں 5 بچے، ایک خاتون اور 3 پولیس اہلکار شامل ہیں، جبکہ 2 زخمیوں کو تشویشناک حالت کے باعث مزید علاج کے لیے بنوں اسپتال منتقل کر دیا گیا ہے۔

پولیس حکام کا کہنا ہے کہ دہشت گردوں کے خلاف مقابلہ تاحال جاری ہے۔ آپریشن میں لکی مروت اور بنوں پولیس حصہ لے رہی ہے، جبکہ سی ٹی ڈی بھی کارروائی میں شامل ہے۔ 

حکام کے مطابق دہشت گردوں نے حملے کے دوران پولیس کی بکتر بند گاڑیوں کو بھی نقصان پہنچایا، تاہم بنوں سے مزید بکتر بند گاڑیاں موقع پر پہنچا دی گئی ہیں۔

ریجنل پولیس حکام کے مطابق علاقے میں کلیئرنس آپریشن جاری ہے اور صورتحال پر مکمل کنٹرول حاصل کرنے کے لیے سکیورٹی مزید سخت کر دی گئی ہے۔