لکی مروت میں سی ٹی ڈی اور پولیس کی کارروائی، انتہائی مطلوب دہشت گرد کمانڈر ہلاک

لکی مروت (ڈیلی اردو) پاکستان کے شورش زدہ صوبے خیبر پختون خوا کے ضلع لکی مروت میں کاؤنٹر ٹیررازم ڈیپارٹمنٹ (سی ٹی ڈی) اور لکی مروت پولیس نے مشترکہ کارروائی کے دوران انتہائی مطلوب دہشت گرد کمانڈر برکت اللہ عرف برکتی عرف ابوذر کو ہلاک کر دیا۔

ترجمان لکی مروت پولیس کے مطابق کارروائی ضلع لکی مروت کے علاقے وانڈہ امیر خان کے مضافات میں کی گئی، جس میں عوامی امن کمیٹیوں کے رضاکاروں نے بھی پولیس کے ساتھ حصہ لیا۔

آپریشن کے دوران دہشت گرد کمانڈر نے ساتھیوں کے ساتھ پولیس پارٹی پر فائرنگ کی، جس پر دوطرفہ فائرنگ کا تبادلہ ہوا۔ فائرنگ کے نتیجے میں دہشت گرد کمانڈر موقع پر ہلاک ہوگیا۔ بعد ازاں سرچ آپریشن کے دوران اس کی لاش اور زیرِ استعمال اسلحہ برآمد کر لیا گیا، جبکہ اس کے ساتھی علاقے کی دشوار گزار صورتحال کا فائدہ اٹھاتے ہوئے فرار ہوگئے، جن کی تلاش جاری ہے۔

پولیس کے مطابق ہلاک دہشت گرد مختلف فرضی ناموں سے سرگرم دہشت گرد گروہوں کا سرغنہ اور سہولت کار تھا۔ وہ سی ٹی ڈی اور لکی مروت پولیس کے خلاف دہشت گردی، پولیس اور سیکیورٹی فورسز پر حملے، قتل، اقدامِ قتل اور بھتہ خوری سمیت 10 سے زائد سنگین مقدمات میں مطلوب تھا۔

مزید برآں، ہلاک دہشت گرد کانسٹیبلز سمیع اللہ اور اسد اللہ، کانسٹیبل حافظ زینت اللہ اور سابق لیویز اہلکار حیات اللہ کی ٹارگٹ کلنگ اور ہلاکت میں بھی ملوث تھا۔