مردان میں سی ٹی ڈی کی کارروائی، تحریک طالبان پاکستان کا انتہائی مطلوب دہشتگرد گرفتار

اسلام آباد (ش ح ط) کاؤنٹر ٹیرر ازم ڈیپارٹمنٹ (سی ٹی ڈی) نے خیبر پختونخوا کے ضلع مردان میں کارروائی کرتے ہوئے کالعدم تنظیم تحریک طالبان پاکستان کا انتہائی مطلوب دہشت گرد انور خان عرف باچہ سکنہ ضلع باجوڑ حال چارسدہ کو گرفتار کر لیا گیا۔

سی ٹی ڈی حکام کے مطابق ملزم کو ہینڈ گرنیڈ اور پستول سمیت گرفتار کیا گیا، مبینہ دہشتگرد کے سر کی قیمت پچاس لاکھ روپے مقرر تھی۔

حکام کے مطابق گرفتار دہشتگرد کی نشان دہی پر مردان میں دہشتگردی کے لئے چھپائی گئی ہیوی مشین گن، مارٹر گولے، گن، بیرل اور بھاری مقدار میں گولہ بارود بھی برآمد کئے گئے۔

ملزم باچہ سی ٹی ڈی مردان کو دہشگردی کے تیرہ مقدمات میں مطلوب تھا، حکام کے مطابق ملزم سے تفتیش کے دوران مزید انکشافات کی بھی توقع ہے۔