مہمند اور خیبر میں سکیورٹی فورسز کے آپریشن میں دو افغان شہریوں سمیت پانچ دہشت گرد ہلاک

باڑہ + غلنئی (نمائندگان ڈیلی اردو)  پاکستان کے شورش زدہ صوبے خیبر پختونخوا کے اضلاع مہمند اور خیبر میں سکیورٹی فورسز کے الگ الگ آپریشنز کے دوران دو افغان شہریوں سمیت پانچ دہشت گرد ہلاک ہوگئے ہیں۔

ذرائع کے مطابق مہمند ضلع کی تحصیل امبار کے نواحی علاقے رمبت میں سکیورٹی فورسز نے گزشتہ روز خفیہ اطلاع پر کارروائی کی۔

کارروائی کے دوران کالعدم تحریک طالبان پاکستان (ٹی ٹی پی) کے تین دہشت گرد ہلاک ہوگئے۔ ہلاک دہشت گردوں کی شناخت عبدالستار عرف علی، ظفر خان عرف زبیر (دونوں افغان صوبہ غزنی کے رہائشی) اور اسداللہ کے ناموں سے ہوئی ہے۔

ادھر قبائلی ضلع خیبر کی دورافتادہ وادیٔ تیراہ میں سکیورٹی فورسز نے ایک اور آپریشن کے دوران دو دہشت گردوں کو ہلاک کر دیا۔

مقامی ذرائع کے مطابق دہشت گرد گاڑی میں سوار تھے اور سکیورٹی فورسز کی گشتی ٹیم پر فائرنگ کی، جس کے جواب میں جوابی کارروائی میں دونوں دہشت گرد مارے گئے۔

دونوں کی لاشیں تحویل میں لے کر ہیڈکوارٹر منتقل کر دی گئی ہیں، جہاں ان کی شناخت کا عمل جاری ہے۔