مہمند میں سی ٹی ڈی کی کارروائی، دہشت گردوں کو بارود اسمگلنگ کرنے میں ملوث 14 رکنی نیٹ ورک گرفتار

پشاور (ڈیلی اردو) کاؤنٹر ٹیررزم ڈیپارٹمنٹ (سی ٹی ڈی) صوبہ خیبرپختونخوا نے قبائلی ضلع مہمند میں کارروائی کرتے ہوئے بارود اسمگلنگ میں ملوث نیٹ ورک کے 14 مبینہ ملزمان گرفتار کرلیے۔

پشاور میں پریس کانفرنس کرتے ہوئے ایس ایس پی سی ٹی ڈی احمد شاہ نے بتایا کہ نیٹ ورک 6 اضلاع تک پھیلا ہوا تھا۔

انہوں نے بتایا کہ ملزمان کے قبضے سے 275کلوگرام بارود، 600 ڈینونیٹر، 11 بنڈل سیفٹی فیوز اور 7 لاکھ سے زائد نقدی برآمد ہوئی۔ احمد شاہ کا کہنا تھا کہ بارودی مواد کی سمگلنگ میں استعمال شدہ 4 گاڑیاں جبکہ 2 ڈاٹسن، 3 فیلڈر، 5 کرولا گاڑیاں برآمد ہوئیں۔ جبکہ نیٹ ورک کے دو ملزمان کی گرفتاری کے لیے کارروائیاں جاری ہیں۔

ان کا کہنا تھا کہ ملزمان خیبر پختونخوا میں کان کنی کی آڑ میں بارودی مواد جمع کرتے تھے، یہ بارودی مواد کان کنی میں استعمال نہیں کیا جا رہا تھا جبکہ دہشت گردی کے مختلف واقعات میں یہی بارودی مواد استعمال ہوا۔

احمد شاہ نے بتایا کہ کان کنی کے لیے بارود حاصل کرنے والے مالکان کے خلاف تحقیقات جاری ہیں اور ملوث ہونے کی صورت میں مالکان کے لائسنس منسوخ کیے جائیں گے۔