میکسیکو سٹی میں یہودی شہری پر پرتشدد حملہ، پاکستانی نژاد ملزم گرفتار

میکسیکو سٹی (ڈیلی اردو رپورٹ) میکسیکو کے دارالحکومت میکسیکو سٹی میں ایک یہودی شہری پر مبینہ طور پر پاکستانی نژاد شخص عمر جمار صدیقی نے تشدد کیا، جس کے بعد مقامی سکیورٹی حکام نے حملہ آور کو حراست میں لے لیا ہے۔

متاثرہ شخص کے مطابق حملے کے دوران ملزم اسے "genocider" کہہ کر پکار رہا تھا اور انتہائی جارحانہ رویہ اختیار کیے ہوئے تھا۔ عینی شاہدین کا کہنا ہے کہ واقعہ اچانک پیش آیا جس کے باعث علاقے میں خوف و ہراس پھیل گیا۔

ابتدائی معلومات کے مطابق عمر جمار صدیقی پاکستانی شہری ہے، تاہم ذرائع کا کہنا ہے کہ اس کے پاس ممکنہ طور پر امریکہ کی مستقل یا عارضی رہائش بھی ہو سکتی ہے۔ اس پہلو سے متعلق میکسیکو اور امریکی حکام کے درمیان رابطے متوقع ہیں۔

مقامی پولیس کے مطابق ملزم کو واقعے کے فوراً بعد گرفتار کر لیا گیا جبکہ متاثرہ شخص کو طبی امداد فراہم کی گئی۔ حکام کا کہنا ہے کہ حملے کے محرکات، ممکنہ نفرت انگیز پہلو اور ملزم کی قانونی حیثیت سے متعلق مکمل تحقیقات جاری ہیں۔

واقعے کے بعد انسانی حقوق اور یہودی کمیونٹی سے وابستہ حلقوں نے تشویش کا اظہار کرتے ہوئے مطالبہ کیا ہے کہ واقعے کی شفاف اور غیرجانبدارانہ تحقیقات کی جائیں اور اگر حملہ نفرت انگیز جرم ثابت ہوتا ہے تو قانون کے مطابق سخت کارروائی کی جائے۔

میکسیکو کے حکام کا کہنا ہے کہ ملک میں مذہبی یا نسلی بنیادوں پر تشدد برداشت نہیں کیا جائے گا اور قانون سب کے لیے برابر ہے۔ واقعے سے متعلق مزید تفصیلات تفتیش مکمل ہونے کے بعد سامنے آنے کی توقع ہے۔