وائٹ ہاؤس کے باہر فائرنگ، سیکرٹ سروس نے حملہ آور کو ہلاک کر دیا

واشنگٹن (ڈیلی اردو) امریکی سیکرٹ سروس نے وائٹ ہاؤس کے باہر فائرنگ کرنے والے حملہ آور کو جوابی کارروائی میں ہلاک کر دیا۔ واقعے میں ایک راہگیر زخمی ہوا۔

امریکی سیکرٹ سروس نے تصدیق کی ہے کہ وائٹ ہاؤس کے باہر فائرنگ کرنے والے ایک شخص کو جوابی کارروائی میں گولی مار کر ہلاک کر دیا گیا ہے۔

سیکرٹ سروس کے مطابق ہفتے کی شام تقریباً چھ بجے کے بعد 17ویں اسٹریٹ اور پنسلوینیا ایونیو کے علاقے میں ایک شخص نے اپنے بیگ سے ہتھیار نکال کر فائرنگ شروع کر دی۔

حکام کے مطابق سیکرٹ سروس اہلکاروں نے فوری جوابی فائرنگ کی جس کے نتیجے میں مشتبہ شخص زخمی ہوا اور بعد ازاں اسے اسپتال منتقل کیا گیا جہاں وہ دم توڑ گیا۔ فائرنگ کے دوران ایک راہگیر بھی گولی لگنے سے زخمی ہوا، جسے طبی امداد فراہم کی گئی۔

سیکرٹ سروس کے مطابق واقعے میں کوئی اہلکار زخمی نہیں ہوا۔ واقعے کے وقت امریکی صدر وائٹ ہاؤس کے اندر موجود تھے۔

اطلاعات کے مطابق فائرنگ کے بعد وائٹ ہاؤس کے احاطے میں موجود صحافیوں کو فوری طور پر اندر منتقل کر دیا گیا اور عمارت کو کچھ وقت کے لیے لاک ڈاؤن میں رکھا گیا۔

ذرائع کے مطابق تقریباً 15 سے 30 گولیاں چلائی گئیں۔ بتایا جا رہا ہے کہ حملہ آور نے سیکرٹ سروس اہلکاروں کے قریب پہنچ کر ان پر فائرنگ کی کوشش کی، جس پر جوابی کارروائی کی گئی۔

امریکی میڈیا کے مطابق فائرنگ کے واقعے کے بعد دو افراد زخمی ہوئے، جنہیں اسپتال منتقل کیا گیا۔ بعد ازاں لاک ڈاؤن ختم کر دیا گیا۔

حکام واقعے کی مزید تحقیقات کر رہے ہیں۔