واشک: بلوچ عسکریت پسندوں نے ایس پی آفس سمیت 3 سرکاری دفاتر نذر آتش کر دیے

کوئٹہ (ڈیلی اردو) پاکستان کے شورش زدہ صوبے بلوچستان کے ضلع واشک میں عسکریت پسندوں نے حملہ کر کے سرکاری تنصیبات کو نشانہ بنایا۔

ضلعی انتظامیہ کے ایک سینیئر اہلکار نے واقعے کی تصدیق کرتے ہوئے بتایا کہ حملے کے دوران ایک سے زائد سرکاری دفاتر کو نذر آتش کیا گیا جبکہ ایک بینک کو بھی نقصان پہنچایا گیا۔

فون پر رابطہ کرنے پر ایک عینی شاہد نے بتایا کہ عسکریت پسند گاڑیوں اور موٹر سائیکلوں پر سوار ہو کر صبح تقریباً ساڑھے 11 بجے ضلع ہیڈکوارٹر واشک میں داخل ہوئے۔ ان کے مطابق مسلح افراد اندازاً ساڑھے تین گھنٹے تک شہر میں موجود رہے اور بعد ازاں واپس چلے گئے۔

عینی شاہد کا کہنا تھا کہ عسکریت پسندوں کی موجودگی کے دوران شدید فائرنگ اور دھماکوں کی آوازیں سنائی دیتی رہیں، جس کے باعث شہریوں میں شدید خوف و ہراس پھیل گیا۔ 

انہوں نے بتایا کہ شہر سے نکلنے سے قبل عسکریت پسندوں نے ایس پی واشک کے دفتر، نادرا دفتر اور نیشنل بینک کی عمارت کو نذر آتش کیا۔

واشک میں ایک سینیئر سرکاری افسر نے بھی تصدیق کی ہے کہ عسکریت پسندوں نے ایس پی اور نادرا کے دفاتر کو آگ لگائی جبکہ نیشنل بینک کو بھی نقصان پہنچایا گیا۔ ان کے مطابق بعد میں سکیورٹی فورسز نے علاقے میں کارروائی کی، جس کے بعد عسکریت پسند شہر سے نکل گئے۔

بلوچستان میں غیر یقینی صورتحال برقرار

ہفتے کے روز کوئٹہ سمیت بلوچستان کے 12 شہروں میں ہونے والے مسلح حملوں کے بعد صوبے میں غیر یقینی صورتحال برقرار ہے۔ سکیورٹی خدشات کے باعث پیر کو تیسرے روز بھی موبائل فون انٹرنیٹ سروس معطل رہی، جبکہ کوئٹہ اور پاکستان کے دیگر شہروں کے درمیان ٹرین سروس بھی بند رہی۔

حکومت نے سکیورٹی خدشات کے پیش نظر بلوچستان میں ایک مرتبہ پھر ایک ماہ کے لیے دفعہ 144 نافذ کر دی ہے۔ دفعہ 144 کے تحت اسلحے کی نمائش، پانچ یا پانچ سے زائد افراد کے اجتماع اور شناخت چھپانے کے لیے چہرہ ڈھانپنے پر پابندی عائد کر دی گئی ہے۔