وانا حملے میں افغان عناصر ملوث تھے، دہشت گردوں کو منہ توڑ جواب دیں گے: وزیراعظم شہباز شریف

اسلام آباد (ڈیلی اردو ) وزیراعظم شہباز شریف نے کہا ہے کہ وانا میں دہشت گردی کی کوشش کرنے والے خوارج میں بدقسمتی سے افغانستان سے تعلق رکھنے والے افراد بھی شامل تھے۔ دہشت گردوں کو پہلے بھی منہ توڑ جواب دیا، اب بھی دیں گے۔

قومی اسمبلی میں اظہارِ خیال کرتے ہوئے وزیراعظم نے کہا کہ پاکستان چاہتا ہے افغانستان امن عمل میں شریک ہو اور اپنی سرزمین دہشت گردوں کے استعمال سے روکے۔ انہوں نے کہا کہ ’’ہم نے افغان عوام کی 40 برس میزبانی کی، مگر اب وقت ہے کہ وہ اپنے ملک میں امن و استحکام کے لیے کردار ادا کریں۔‘‘

وزیراعظم نے کہا کہ ایوان نے آج 27ویں آئینی ترمیم پر بڑی یکجہتی کا مظاہرہ کیا، یہ ترمیم بھرپور مشاورت کے بعد آئین کا حصہ بن گئی ہے۔

انہوں نے مزید کہا کہ اگر کوئی منصوبہ وفاق کو کمزور کرے تو وہ کتنا ہی شاندار کیوں نہ ہو، پاکستان کے لیے فائدہ مند نہیں۔ ’’کالاباغ ڈیم معاشی طور پر مفید ضرور ہے مگر قومی یکجہتی سے بڑھ کر کوئی چیز نہیں،‘‘ وزیراعظم کا کہنا تھا۔

شہباز شریف نے کہا کہ میثاقِ جمہوریت میں واضح طور پر آئینی عدالت کے قیام کا ذکر موجود ہے۔ ’’چیف جسٹس یحییٰ آفریدی کے مشکور ہیں جنہوں نے ریونیو کیسز میرٹ پر حل کیے،‘‘ انہوں نے کہا۔

اسلام آباد کچہری حملے کے حوالے سے وزیراعظم نے کہا کہ اس اندوہناک واقعے کی مکمل تحقیقات ہوں گی۔ ’’یہ ناقابلِ قبول ہے کہ ہمارے ساتھ جھوٹے وعدے کیے جائیں، بھارت کے ملوث ہونے کے شواہد موجود ہیں،‘‘ وزیراعظم نے دعویٰ کیا۔

انہوں نے کہا کہ بھارت کو چار دن کے معرکے میں شکست فاش دی گئی، نریندر مودی آج بھی بے بسی کا شکار ہے۔ ’’پاکستان دہشت گردی کے خلاف متحد ہے، افواجِ پاکستان اور قانون نافذ کرنے والے ادارے عظیم قربانیاں دے رہے ہیں۔‘‘

شہباز شریف نے آخر میں کہا کہ ’’آرمی چیف کو فیلڈ مارشل کا ٹائٹل دینے کے فیصلے کو قوم نے سراہا، عرفان صدیقی صرف استاد نہیں بلکہ استادوں کے استاد تھے۔‘‘